ޑްރަގް ކޯޓުން ފަރުވާގެ ޕްރޮގްރާމުގައި ބައިވެރިކޮށްފައިވާ އިތުރު ދެ މީހަކު ފަރުވާގެ ޕްރޮގްރާމު ފުރިހަމަކުރުމާއެކު އެމީހާގެ މައްޗަށް ކޮށްފައިވާ ފުރަތަމަ ޙުކުމް ބާޠިލު ކުރުމަށްފަހު މިނިވަން ކުރުމަށް ކޯޓުން ފަހުގެ ޙުކުމް ކޮށްފިއެވެ. ފަހުގެ ޙުކުމް ކުރެވިފައިވަނީ ދަފްތަރު ނަންބަރު ރސ 102828 މުޙައްމަދު ނިޘާމް އާއި ހ.މާދުނި މުޙައްމަދު މިޔާމަން ނަސީމްގެ މައްޗަށެވެ.

މުޙައްމަދު ނިޘާމް ފަރުވާ ޕްރޮގްރާމްގައި ބައިވެރިކޮށްފައިވަނީ 15 އޯގަސްޓް 2013 ގައެވެ. އަދި މުޙައްމަދު މިޔާމަން ނަސީމް ފަރުވާގެ ޕްރޮގްރާމްގައި ބައިވެރިކޮށްފައިވަނީ 04 ޖުލައި 2013 ގައެވެ. މުޙައްމަދު ނިޘާމް ބައިވެރިކޮށްފައިވަނީ ޑްރަގް ޓްރީޓްމަންޓް އެންޑް ރީހެބިލިޓޭޝަން ސެންޓަރުގެ 03 މަސްދުވަހުގެ ފަރުވާ އާއި ކޮމިޔުނިޓީ ރީހެބިލިޓޭޝަން 03 މަސް ދުވަހުގެ ފަރުވާ ޕްރޮގްރާމްގައެވެ. އަދި މުޙައްމަދު މިޔާމަން ނަސީމް ބައިވެރިކޮށްފައިވަނީ ކޮމިޔުނިޓީ ފަރުވާގެ 6 މސް ދުވަހުގެ ޕްރޮގްރާމްގައެވެ.

މުޙައްމަދު ނިޘާމް ތަންފީޛު ކުރަމުން ދިޔަ 12 އަހަރު ދުވަހުގެ މުއްދަތަށް ޖަލަށްލުމުގެ ޙުކުމާއި މުޙައްމަދު މިޔާމަން ނަސީމް ތަންފީޛު ކުރަމުންދިޔަ 03 އަހަރުދުވަހުގެ މުއްދަތަށް ޖަލަށްލުމުގެ ޙުކުމްވެސް ވަނީ ބާޠިލުކޮށްފައެވެ.