މި ޕްރޮގްރާމަކީ، މުޖުތަމަޢުން އެކަހެރިކުރުމަށް ފަހު، ރެސިޑެންޝަލް މަރުކަޒެއްގައި ބައިތިއްބައިގެން ކުރިއަށް ގެންދެވޭ ފަރުވާގެ ޕްރޮގްރާމެކެވެ. މި ޕްރޮގްރާމުގެ ތެރޭގައި ފުރިހަމަކުރަންޖެހޭ ކުލާސްތަކާއި، ކައުންސެލިންގ ސެޝަންތައް ހިމެނެއެވެ. މި ޕްރޮގްރާމުގެ މުއްދަތަކީ 121 ދުވަހެވެ. ނަމަވެސް، ޕްރޮގްރާމު ފުރިހަމަކުރުމުގެ ތެރޭގައި ދިމާވާ ކަންކަމަށް ބަލައި، މަރުޙަލާތަކާއި މުއްދަތަށް ބަދަލު އައުމަކީ އެކަށީގެންވާ ކަމެކެވެ.

އަންހެނުންނަށް ޚާއްޞަ ރެސިޑެންޝަލް ފަރުވާގެ ޕްރޮގްރާމަކީ މުޖުތަމަޢުން އެކަހެރިކުރުމަށް ފަހު، ރެސިޑެންޝަލް މަރުކަޒުގައި ބައިތިއްބައިގެން ކުރިއަށް ގެންދެވޭ އަންހެނުންނަށް ޚާއްޞަ ފަރުވާގެ ޕްރޮގްރާމެކެވެ. މި ޕްރޮގްރާމުގެ ތެރޭގައި ފުރިހަމަކުރަންޖެހޭ ކުލާސްތަކާއި، ކައުންސެލިންގ ސެޝަންތައް ހިމެނެއެވެ.

ކޮމިއުނިޓީ ރީއިންޓަގްރޭޝަން ޕްރޮގްރާމަކީ ރެސިޑެންޝަލް ފަރުވާއެއް ފުރިހަމަކުރުމަށް ފަހު، މުތަމަޢަށް އަހުލުވެރި ކުރުމުގެ ގޮތުން ހިންގޭ ޕްރޮގްރާމެކެވެ. މިޕްރޮގްރާމުގެ މައިގަނޑު ބޭނުމަކީ ރެސިޑެންޝަލް ފަރުވާގެ މުއްދަތުގައި ފަރުވާ ލިބިގަންނަ ފަރާތުން ދަސްކޮށްފައިވާ ކަންތައްތައް މުޖުތަމަޢުގައި ބޭނުންކުރުމަށް އަހުލުވެރިކުރުމާއި، މުޖުތަމަޢުގައި ހުރެގެން ފަރުވާ ފުރިހަމަކުރާއިރު ދިމާވާ ކަންތައްތަކުގައި އެހީތެރިކަން ފޯރުކޮށްދިނުމެވެ. މުޖުތަމަޢުގައި ބަހައްޓައިގެން ފަރުވާގެ ބައެއް ފުރިހަމަކުރުމުގެ ބޭނުމަކީ ރެސިޑެންޝަލް ފަރުވާ ފުރިހަމަކުރުމަށްފަހު މުޖުތަމަޢުގައި ހުންނަ ދުވަސްވަރު ދެވަނަ ފަހަރަށް މަސްތުވާތަކެތި ބޭނުންކުރުމުގެ ފުރުސަތު (ރިލެޕްސްވުމުގެ ފުރުސަތު) ވީހާ ވެސް ކުޑަކޮށް، ޒިންމާދާރު މީހަކަށް މީހާ ހެދުމެވެ. މި ޕްރޮގްރާމުގެ މުއްދަތަކީ 03 މަސްދުވަހެވެ.

ކޮމިއުނިޓީ ރީއިންޓަރގްރޭޝަން (އެކްސްޓެންސިވް) ޕްރޮގްރާމުގެ ބޭނުމަކީ މަސްތުވާތަކެތި ބޭނުންކުރުމުގެ މައްސަލަ މާ ބޮޑު ނޫން މީހުންނަށް މުޖުތަމަޢުގައި ބައިތިއްބައިގެން ފަރުވާ ދިނުމެވެ.

މި ޕްރޮގްރާމް ބަހާލެވިފައިވަނީ މައިގަނޑު ދެ ފިޔަވައްސަކަށެވެ. ފުރަތަމަ ފިޔަވަހީގައި ފުރިހަމަކުރަންޖެހޭނީ ކްލާސްތަކަކާއި ސްކިލްސް ކްލާސްތަކަކެވެ. ދެވަނަ ފިޔަވަހީގައި ކުރިއަށް ގެންދެވޭނީ މޮނިޓަރިންގެ ބައެވެ.

މި ޕްރޮގްރާމް ބަހާލެވިފައިވަނީ މައިގަނޑު ދެ ފިޔަވައްސަކަށެވެ. ފުރަތަމަ ފިޔަވަހީގައި ފުރިހަމަކުރަންޖެހޭނީ ކްލާސްތަކަކާއި ސްކިލްސް ކްލާސްތަކަކެވެ. ދެވަނަ ފިޔަވަހީގައި ކުރިއަށް ގެންދެވޭނީ މޮނިޓަރިންގެ ބައެވެ.

މި ޕްރޮގްރާމުގެ މުއްދަތަކީ 06 މަސްދުވަހެވެ.

މަސްތުވާތަކެތި ބޭނުންކުރާ މީހުންގެ ތެރެއިން ފަރުވާފުރިހަމަކުރާ ބައެއް މީހުންނަކީ ފަރުވާގެ މުއްދަތުގެތެރޭގައި ވަޒީފާ އަދާކުރަމުންދާ މީހުންނެވެ. ރިކަވަރީ މެއިންޓަނަންސް ޕްރޮގްރާމަކީ ފަރުވާ ފުރިހަމަކުރާ މީހުންނަށް ފަސޭހަކަމާއެކު ފުރިހަމަކުރެވޭނެ ފަރުވާގެ ޕްރޮގްރާމެއް ތަޢާރަފުކޮށް ފަރުވާހޯދާ ފަރާތްތަކުގެ ބޭނުންތަކަށް އިސްކަންދީގެން އެހިތެރިކަން ފޯރުކޮށްދިނުމަށް ފަރުމާ ކުރެވިފައިވާ ޕްރޮގްރާމެކެވެ.

މިޕްރޮގްރާމުގެ މައިގަނޑު މަޤްސަދަކީ، ދިރިއުޅުމުގައި ޒިންމާދާރުކަމާއެކު މަސައްކަތްކުރާ މީހުންނަށް ބޭނުންވާ އެހީތެރިކަން ފޯރުކޮށްދީ އެމީހުންނަކީ މަސްތުވާތަކެތި ބޭނުން ނުކުރާ، މުޖުތަމަޢުގައި ފައިދާ ހުރި، ޒިންމާދާރު ބަޔަކަށް ހެދުމެވެ. އަދި ހަމައެހެންމެ މަސްތުވާތަކެތި ބޭނުން ނުކޮށް ދެމިހުރުމަށް ބޭނުންވާ އެހީތެރިކަން ދިގު މުއްދަތަކަށް ލިބޭނެ އިންތިޒާމު ހަމަޖައްސައިދިނުމަކީ ވެސް ރިކަވަރީ މެއިންޓަނަންސް ޕްރޮގްރާމުގެ މަޤްޞަދުތަކުގެ ތެރޭގައި ހިމެނޭ ކަމެކެވެ.

މި ޕްރޮގްރާމުގެ މުއްދަތަކީ 03 މަސްދުވަހެވެ.

މެތަޑޯން މެއިންޓަނަންސް ޓްރީޓްމަންޓް (އެމް.އެމް.ޓީ) ޕްރޮގްރާމަކީ އޮފިއޮއިޑް ސަބްސްޓިޓިއުޝަން ތެރަޕީ ޕްރޮގްރާމެކެވެ. މިއީ މަސްތުވާތަކެއްޗަށް ދެވިހިފާފައިވާ މީހުންގެ ތެރެއިން އޮޕިއޮއިޑަށް ދެވިހިފާފައިވާ ( ޚާއްޞަކޮށް ކަށީގެ ޛަރީޢާއިން އޮޕިއޮއިޑް ހަށިގަނޑަށް އެތެރެ ކުރާ) މީހުންނަށް ލިބޭ ގެއްލުން ކުޑަކުރުމަށާއި، އަދި މިކަމާ ގުޅިގެން މުޖުތަމަޢުގައި ފެތުރިދާނެ ބަލިމަޑުކަން ދުރުކުރުމުގެ ގޮތުން ދެވޭ ފަރުވާއެކެވެ.

މިޕްރޮގްރާމް އެކުލެވިގެންވަނީ މައިގަނޑު ދެ ބައެއްގެ މައްޗަށެވެ. އެއީ މެޑިކަލް ކޮމްޕޯނަންޓާއި ސައިކޮސޯޝަލް ކޮމްޕޯނަންޓުގެ މައްޗަށެވެ.

މެޑިކަލް ކޮމްޕޯނަންޓްގައި ހިމެނެނީ މެތަޑޯން މެއިންޓަނަންސް ފަރުވާ ދިނުމެވެ. މި ބައިގައި، މެޑިކަލް ކޮންސަލްޓޭޝަން އަދި ކޮންމެ ދުވަހަކު ޑޯޒް ނެގުން ހިމެނެއެވެ. ސައިކޮސޯޝަލް ކޮމްޕޯނަންޓުގައި ހިމެނެނީ ކްލައިންޓުންނަށް ހިންގޭ ކްލާސްތަކާއި ކައުންސެލިންގ ސެޝަންތަކެވެ.

މިޕްރޮގްރާމްގެ ހުރިހާ ފޭސްތަކެއް ވެސް ކުރިޔަށް ދާނީ މެޑިކަލް އަދި ސައިކޮސޯޝަލް ކޮމްޕޯނަންޓް ހިމެނޭ ގޮތުގެ މަތިންނެވެ.

މި ޕްރޮގްރާމުގެ މުއްދަތަކީ 20 މަސް ދުވަހެވެ.