ޑްރަގް ކޯޓުން ފަރުވާގެ ޕްރޮގްރާމުގައި ބައިވެރިކޮށްފައިވާ އިތުރު 03 މީހަކު ފަރުވާގެ ޕްރޮގްރާމު ފުރިހަމަކުރުމާއެކު އެ މީހުންގެ މައްޗަށް ކޮށްފައިވާ ފުރަތަމަޙުކުމް ބާޠިލު ކުރުމަށްފަހު މިނިވަން ކުރުމަށް ކޯޓުން ފަހުގެޙުކުމް ކޮށްފިއެވެ. ފަހުގެޙުކުމް ކުރެވިފައިވަނީ ގދ.ގައްދޫ ދަތުރުނާގޭ، އިސްމާޢީލް ނަވާޒް ސަޢީދު އާއި ގދ.ފަރެސްމާތޮޑާ ސަންރައިސް، އަޙްމަދު ފިރުޝާން އަދި ކ.މާލެ މ.ފޯރމޫންސް، ޙަސަން ފަޔާޟްގެ މައްޗަށެވެ.

އިސްމާޢީލް ނަވާޒް ސަޢީދު ފަރުވާ ޕްރޮގްރާމްގައި ބައިވެރިކޮށްފައިވަނީ 12 މާރޗް 2013 ގައެވެ. އަޙްމަދު ފިރުޝާން ފަރުވާ ޕްރޮގްރާމްގައި ބައިވެރިކޮށްފައިވަނީ 26 ފެބްރުއަރީ 2013 ގައެވެ. އަދި ޙަސަން ފަޔާޟް ފަރުވާގެ ޕްރޮގްރާމްގައި ބައިވެރިކޮށްފައިވަނީ 03 އޮކްޓޯބަރ 2013 ގައެވެ.

އިސްމާޢީލް ނަވާޒް ސަޢީދު ބައިވެރިކޮށްފައިވަނީ ކޮމިޔުނިޓީ ރީހެބިލިޓޭޝަން 06 މަސް ދުވަހުގެ ފަރުވާ ޕްރޮގްރާމްގައެވެ. އަޙްމަދު ފިރުޝާން އާއި ޙަސަން ފަޔާޟް ބައިވެރިކޮށްފައިވަނީ ޑްރަގް ޓްރީޓްމަންޓް އެންޑް ރީހެބިލިޓޭޝަން ސެންޓަރުގެ ފަރުވާ ޕްރޮގްރާމް ފުރިހަމަ ކުރުމަށްފަހު ކޮމިޔުނިޓީ ރީހެބިލިޓޭޝަން 03 މަސް ދުވަހުގެ ފަރުވާ ޕްރޮގްރާމްގައެވެ.

އިސްމާޢީލް ނަވާޒް ސަޢީދު ތަންފީޛު ކުރަމުންދިޔަ 03 އަހަރު ދުވަހުގެ މުއްދަތަށްޖަލަށްލުމުގެ ޙުކުމް 02 އަހަރު ދުވަހުގެ މުއްދަތަށް ފަސްކޮށް، މި މުއްދަތުގައި އިތުރުކުށެއް ކުރިކަން ޝަރީޢަތަށް ސާބިތުނުވާނަމަ، މި ޙުކުމް އިތުރަށް ތަންފީޛު ނުކުރުމަށާއި މި މުއްދަތު ތެރޭގައި އިތުރުކުށެއް ކޮށްފިކަން ޝަރީޢަތަށް ސާބިތުވެއްޖެނަމަ، އެ ސާބިތުވި ޙުކުމާއި މި ޙުކުމް ތަންފީޛު ކުރުމަށް ވަނީ ކަނޑައަޅާފައެވެ. އަދި އަޙްމަދު ފިރުޝާން ތަންފީޛު ކުރަމުންދިޔަ 10 އަހަރު ދުވަހުގެ މުއްދަތަށް ޖަލަށްލުމުގެ ޙުކުމާއި ޙަސަން ފަޔާޟް ތަންފީޛު ކުރަމުންދިޔަ 05 އަހަރާއި 06 މަސް ދުވަހުގެ މުއްދަތަށް ޖަލަށްލުމުގެ ޙުކުމް ވެސް ވަނީ ބާޠިލް ކޮށްފައެވެ.