ނޭޝަނަލް ޑްރަގް އެޖެންސީން ސ.ހިތަދޫގައި ހިންގާ ޑްރަގްޓްރީޓްމެންޓް އެންޑް ޑިޓޮކްސިފިކޭޝަން ސެންޓަރުގައި ފަރުވާ ހޯދަމުންދާ މީހުންގެ ފަރުވާގެ ޕްރޮގްރާމުތައް ހިނގާ ގޮތް ބެލުމަށްޓަކައި އެ ސެންޓަރަށް ޑްރަގް ކޯޓުގެ ޓީމެއް ޒިޔާރާތްކޮށްފިއެވެ.

13 ސެޕްޓެމްބަރު 2015 އިން 16 ސެޕްޓެމްބަރ 2015 އަށް ކުރި މި ޒިޔާރަތުގައި ވަޑައިގެންނެވީ ކޯޓު ހިންގެވުމާ ޙަވާލުވެހުންނެވި ޤާޟީ އަލްއުސްތާޛު ޢަބްދުއްސައްތާރު ޢަބްދުލްޙަމީދާއި، ޤާޟީ އަލްއުސްތާޛު މުޙައްމަދު ޢީސާފުޅާއި، ލީގަލް އޮފިސަރު އަލްއުސްތާޛާ ފާޠިމަތު ތައުފީޤާއި، ކޮމްޕިޔުޓަރު ޓެކްނީޝަން ޢަލީ ޝަމީނެވެ.

މި ޒިޔާރަތުގައި ފަރުވާދޭ ސެންޓަރުގެ ވެރިންނާއި، މުވައްޒަފުންނާއި، ފަރުވާ ހޯދަމުންދާ ފަރާތްތަކާ ބައްދަލުކޮށް، ސެންޓަރުގެ ކަންކަން ބަލައި ވަޒަން ކުރެވުނެވެ. މީގެ އިތުރުން، ޑްރަގް ކޯޓުގެ ފަރާތުން ސ.ހިތަދޫ މެޖިސްޓްރީޓް ކޯޓުގެ މެޖިސްޓްރޭޓުންނާއި، އައްޑޫ ސިޓީގެ ފުލުހުންގެ އިސްވެރިންނާ ބައްދަލުކުރައްވައި، ޑްރަގް ކޯޓުގެ މަސައްކަތްތަކާ ގުޅުން ހުރި ދާއިރާތަކުގައި މަޝްވަރާކުރައްވާފައިވެއެވެ.