އަލަށް ޢަމަލުކުރެވެމުންދާ މަސްތުވާތަކެއްޗާބެހޭ ޤާނޫނުގެ ދަށުން އުފެދިފައިވާ ޑްރަގް ކޯޓުގެ މަސައްކަތްތައް ފެށުނު ފަހުން މީހެއްގެ މައްޗަށްކުރި ފުރަތަމަ ޙުކުމް މިއަދު އިއްވައިފިއެވެ. މިއަދު ހެނދުނު 9:30 ގައި ބޭއްވުނު ޝަރީޢަތުގެ މަޖިލިހުގައި މި ޙުކުމް އިއްވާފައިވަނީ މ.ފްރެންޑްޝިޕް، އިބްރާހީމް ޙަލީމްގެ މައްޗަށެވެ. އާ ޤާނޫނުގެ ދަށުން ކްރިމިނަލް ކޯޓުން ޑްރަގް ކޯޓަށް ތަޙްވީލުކުރެވިފައިވާ މި މައްސަލައިގައި،

ދައުލަތުގެ ފަރާތުން އޭނާގެ މައްޗަށް އުފުލާފައިވާ ދަޢުވާއަކީ މަނާކުރެވިފައިވާ މަސްތުވާއެއްޗެއް ބޭނުންކުރުމާއި، ބޭނުންކުރުމަށްޓަކައި އަތުގައި ބެހެއްޓުމާއި، ބޭހުގެ ގޮތުގައި ބޭނުންކުރެވޭ މަސްތުވާ އެއްޗެއް ބޭނުންކުރުމުގެ ކުށުގެ ދަޢުވާއެވެ.

ޑްރަގް ކޯޓު ހިންގެވުމާ ޙަވާލުވެހުންނެވި ޤާޟީ އަލްއުސްތާޛު މަޙާޒް ޢަލީ ޒާހިރު މި މައްސަލައިގައި ޙުކުމްކުރައްވާފައިވަނީ އިބްރާހީމް ޙަލީމްގެ އިޢްތިރާފުން އޭނާ ޑައިމޯފިން ބޭނުންކުރިކަން ސާބިތުވާތީ، މަސްތުވާތަކެއްޗާބެހޭ ޤާނޫނުގެ 112 ވަނަ މާއްދާގެ (ށ) ގެ ދަށުން 3 އަހަރު ދުވަހަށް ޖަލަށްލުމަށެވެ. އަދި މި ޙުކުމްގައި، އިބްރާހީމް ޙަލީމްގެ ފަރުވާގެ ޕްރޮގްރާމު ނިމެންދެން ނުވަތަ ކޯޓުން އެހެން ގޮތަކަށް ކަނޑައަޅައިފުމަށްދާންދެން މި ޙުކުމް ތަންފީޛުނުކޮށް ހިފެހެއްޓުމަށްވެސް އަމުރުކުރައްވާފައިވެއެވެ.

އިބްރާހީމް ޙަލީމްގެ މައްޗަށްކުރެވުނު ޙުކުމާއެކު، މަސްތުވާތަކެތިން ސަލާމަތްވުމަށް އޭނާ ފުރިހަމަކުރަންޖެހޭ ފަރުވާގެ ޕްލޭން ހިމެނޭ ރިހިބިލިޓޭޝަން އަމުރުވެސް މިއަދުގެ ޙުކުމާއެކުވަނީ ނެރުއްވާފައެވެ. މިއަމުރުގައި އޭނާ ލިބިގަންނަންޖެހޭ ފަރުވާކަމުގައިވާ ބަޔާންވެފައިވަނީ ނޭޝަނަލް ޑްރަގް އޭޖެންސީން ހިންގާ ޑްރަގް ޓްރީޓްމަންޓް އެންޑް ރިހިބިލިޓޭޝަން ސެންޓަރުގެ ފަރުވާގެ ޕްރޮގްރާމާއި، 3 މަސްދުވަހުގެ ކޮމިއުނިޓީ ރިހިބިލިޓޭޝަން ޕްރޮގްރާމެވެ.

ޙުކުމާއި ރިހިބިލިޓޭޝަން އަމުރު