ޤާނޫނު ނަންބަރު 2011/17 (މަސްތުވާތަކެއްޗާބެހޭ ޤާނޫނު)ގެ 43 ވަނަ މާއްދާއިން ޑްރަގް ކޯޓުގެ ފަނޑިޔާރުން ރާއްޖޭގެ އެކި ސަރަހައްދުތަކުގައި މަސައްކަތްކުރުމަށް ހުއްދަކުރާތީއާއި، ޑްރަގް ކޯޓަށް ހުށަހެޅިފައިވާ ގިނަ ޢަދަދެއްގެ މައްސަލަތަކުގެ ދަޢުވާލިބޭފަރާތްތަކަކީ ޖަލުގައި ޙުކުމްތަންފީޒުކުރަމުންދާ ފަރާތްތަކަކަށްވެފައި އެފަރާތްތައް ޑްރަގް ކޯޓަށް ޙާޟިރުކުރުމުގައި ގިނަ ދަތިތައްކުރިމަތިވަމުންދާތީ،

ޑިޕާޓްމަންޓް އޮފް ޕެނިޓެންޝަރީ އެންޑް ރިހެބިލިޓޭޝަން ސަރވިސްއާއި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންއާ ގުޅިގެން ޑްރަގް ކޯޓުގެ އަޑުއެހުންތަކެއް 14 ފެބްރުއަރީ 2013 ވީ ބުރާސްފަތި ދުވަހު ކ. މާފުށީ މެޖިސްޓްރޭޓް ކޯޓުގައި ވަނީ ކުރިއަށް ގެންދެވިފައެވެ.

14 ފެބްރުއަރީ 2013 ވަނަ ދުވަހު ކ.މާފުށީ މެޖިސްޓްރޭޓް ކޯޓުގައި 10 އިބްތިދާއީ އަޑުއެހުމާއި، 15 ޝަރީޢަތެއް ކުރިއަށް ގެންދިޔުމަށް ތާވަލު ކުރެވުނެވެ. މީގެ ތެރެއިން ތާވަލު ކުރެވުނު 10 އިބްތިދާއީ އަޑުއެހުން ކުރިޔަށް ގެންދެވި 8 ފަރާތަކަށް އިންޑިކޭޓިވް އެސެސްމަންޓް ހެދުމުގެ އަމުރު ނެރެވިފައިވެއެވެ. ތާވަލު ކުރެވުނު 15 ޝަރީއަތުގެ ތެރެއިން 14 ޝަރީއަތެއް ކުރިޔަށް ގެންދެވި ޙުކުމްކޮށް ރީހެބިލިޓޭޝަން އަމުރު ކުރެވުނެވެ.