ޑްރަގް ކޯޓަށް ހުށަހެޅޭ މައްސަލަތަކުގައި ހިމެނޭ ގިނަ ޢަދަދެއްގެ މީހުންނަކީ ޖިނާއީ ކުށް ކުށުގެ ޙުކުމް ތަންފީޛުކުރުމުގެ ގޮތުން ކ.މާފުށީ ޖަލުގައި ތިބޭ ބަޔަކަށްވާތީއާއި، އެފަދަ މީހުން ޑްރަގް ކޯޓުގެ ޝަރީޢަތުގެ މަޖިލީހަށް ޙާޟިރުކުރުމުގައި ގޮންޖެހުންތަކެއް ކުރިމަތިވެފައިވާތީއާއި، ޝަރީޢަތްތައްކުރިއަށް ގެންދިއުމުގައި ޒަމާނީ ޓެކްނޮލޮޖީގެ ބޭނުން ހިފުމުގެ ގޮތުން މާފުށީ ޖަލުގައި ޙުކުމްތަންފީޛުކުރަމުންދާ މީހުން ކ. މާފުށީ މެޖިސްޓްރޭޓް ކޯޓަށް ޙާޟިރުކުރުމަށްފަހު އެފަދަ މީހުންގެ އަޑުއެހުންތައް މިއަދު 13:30ގައި ވީޑިއޯ ލިންކް މެދުވެރިކޮށް ފަށައިފިއެވެ.

ވީޑިއޯ ލިންކް މެދުވެރިކޮށް އަޑުއެހުންތައް ކުރިއަށް ގެންދިއުމުން ޑްރަގް ކޯޓުގެ ބަޖެޓުން މާފުށްޓަށް ކުރާދަތުރުތަކުގެ ޚަރަދާއި، ޑްރަގް ކޯޓަށް މީހުން ޙާޟިރުކުރުމުގައި އެކި އިދާރާތަކުން ޚަރަދުކުރާ މިންވަރު މަދުވާނެއެވެ. އެވްރެޖް ގޮތެއްގައި ކ. މާފުށީ މެޖިސްޓްރޭޓް ކޯޓުގައި ޝަރީޢަތުގެ އަޑުއެހުން ބޭއްވުމަށްޓަކައި ޑްރަގް ކޯޓުން ކުރާ ދަތުރުތަކަށް ފަސްހާހާއި ހަ ހާހާއި ދެމެދުގެ ޢަދަދަކަށް ފައިސާ ހޭދަވެއެވެ.