ޤާނޫނު ނަންބަރު 2011/17 (މަސްތުވާތަކެއްޗާބެހޭ ޤާނޫނު)ގެ 45 ވަނަ މާއްދާގައިވާ ގޮތުގެ މަތިން ނެޝަނަލް ޑްރަގް އޭޖެންސީން ޑްރަގް ކޯޓަށް ލަފާ ދިނުމަށްޓަކައި، ފަންނީ ޓީމެއް އެކުލަވާލައި ފަންނީ ޓީމާއެކު ފުރަތަމަ ބައްދަލުވުން 04 އޭޕްރީލް 2013 ވީ ބުރާސްފަތި ދުވަހު ކޯޓުގައި ބޭއްވުނެވެ.

މި ބައްދަލުވުމުގައި މަޝްވަރާ ކުރެވުނީ މައިގަނޑު ދެ ކަމެއްގެ މައްޗަށެވެ. އެކަންތައްތަކަކީ، މެތަޑޯން މެއިންޓަނަންސް ޕްރޮގްރާމު ކުރިއަށް ގެންދިއުމުގައި ޑްރަގް ކޯޓުގެ ފަނޑިޔާރުން ސާފުކުރަންޖެހޭ މަޢުލޫމާތު ތަކާއި، ފަންނީ ޓީމުގެ ލަފާ ހޯދުމުގައި ޢަމަލުކުރާނެ އުސޫލެވެ.

ފަންނީ ޓީމަކީ، ޑްރަގް ކޯޓުން މައްސަލަ ބެލުމުގައާއި، މަސްތުވާތަކެތި ބޭނުންކުރާ މީހުންނަށް ފަރުވާގެ ޕްރޮގްރާމުތައް ކަނޑައެޅުމުގައި ޑްރަގް ކޯޓަށް ބޭނުންވާ ލަފާ ދިނުމަށް ނޭޝަނަލް ޑްރަގް އެޖެންސީން ހަމަޖައްސާފައިވާ ޓީމެކެވެ.