ނޭޝަނަލް ޑްރަގް އެޖެންސީން ކ. ހިންމަފުށީގައި ހިންގާ ޑްރަގް ޓްރީޓްމަންޓް އެންޑް ރީހެބިލިޓޭޝަން ސެންޓަރުގެ އިންޓޭކް މަރުޙަލާގައި ޖާގަފުރިފައިވާކަން އެ އެޖެންސީން ޑްރަގް ކޯޓަށް އަންގައިފިއެވެ. ފަރުވާދޭ މަރުކަޒުތަކުގައި ފަރުވާދިނުމުގެ އިންތިޒާމުތައް ހަމަޖެއްސެން ނެތްކަމަށް ކޯޓަށް ޤަބޫލުކުރެވޭ ޙާލަތުގައި މަސްތުވާތަކެއްޗާބެހޭ ޤާނޫނުގެ 69 ވަނަ މާއްދާގެ ދަށުން ފަރުވާގެ ޕްރޮގްރާމުގައި ބައިވެރިކުރާ މީހުންގެ މައްޗަށް ސާބިތުވާކުށުގެ ޙުކުމް (ފުރަތަމަ ޙުކުމް) ތަންފީޛުކުރަން ފެށުމަށް ކޯޓުން އަމުރުކުރަންޖެހޭނެއެވެ. މި ގޮތަށް ކުރާ އަމުރު ދެމިއޮންނާނީ ފުރަތަމަ ޙުކުމްކުރާ ތާރީޚުން ފެށިގެން 90 ދުވަސް ހަމަވުމާއި ފަރުވާގެ އިންތިޒާމުތައް ހަމަޖެހުމުގެ ތެރެއިން ފުރަތަމަ ދިމާވާކަމެއް ހިނގުމާ ހަމައަށެވެ.

މަތީގައިވާ ގޮތަށް ޑްރަގް ކޯޓުން މިއަދު ފުރަތަމަ ޙުކުމާއި ރީހެބިލިޓޭޝަން އަމުރުކުރި މީހުންގެ ތެރެއިން 24 މީހުންގެ ފުރަތަމަ ޙުކުމް ތަންފީޛުކުރަން ފެށުމަށް އަމުރުކުރެވިފައިވެއެވެ.