ޖޫން
2013
އިތުރު ތިން މީހަކު ޑްރަގް ކޯޓުގެ ފަރުވާގެ ޕްރޮގްރާމު ފުރިހަމަކޮށްފި!
ޑްރަގް ކޯޓުގެ ރީހެބިލިޓޭޝަން އަމުރުގެ ދަށުން ފަރުވާފުރިހަމަކުރުމާއެކު، މަސްތުވާތަކެއްޗާބެހޭ ޤާނޫނުގެ 85 ވަނަ މާއްދާގެ ދަށުން ހދ.ހަނިމާދޫ، ރަންވިލާ، ޢަލީ ރަޝީދު އާއި ބ.ގޮއިދޫ، ސޭޑީކޯނަރ، ޢަބްދުﷲ ޞަލާޙް އަދި ކ.މާލެ، މއ.ކަނޑޫގެ، ޢަބްދުﷲ ޒަރީރުގެ މައްޗަށް ފަހުގެ ޙުކުމް އިއްޔެކޮށްފިއެވެ. ޢަލީ ރަޝީދު އާއި ޢަބްދުﷲ ޞަލާޙް އާއި ޢަބްދުﷲ ޒަރީރު އަކީ ނޭޝަނަލް ޑްރަގް އެޖެންސީގެ ކޮމިއުނިޓީ ސަރވިސް ސެންޓަރުން ހިންގި 06 މަސްދުވަހުގެ ކޮމިއުނިޓީ ފަރުވާގެ ޕްރޮގްރާމްގައި ބައިވެރިވެ ރީހެބިލިޓޭޝަން އަމުރާ އެއްގޮތަށް ކާމިޔާބުކަމާއެކު ފަރުވާ ފުރިހަމަކޮށްފައިވާ ފަރާތްތަކެކެވެ.
މިތިން ފަރާތުން ފަރުވާގެ ޕްރޮގްރާމު ފުރިހަމަކުރުމާއެކު އެފަރާތްތަކުގެ ފުރަތަމަ ޙުކުމުގެ ގޮތުގައި ހިފެހެއްޓިފައިވާ ޙުކުމްތައް ޑްރަގް ކޯޓުން ބާޠިލްކޮށްފައެވެ. މިމީހުންގެ މައްޗަށް ފަހުގެ ޙުކުމްކުރެވުމާއެކު، ޑްރަގް ކޯޓުގެ ފަރުވާގެ ޕްރޮގްރާމު ކާމިޔާބުކަމާއެކު ފުރިހަމަކުރި މީހުންގެ ޢަދަދު 10 އަށް އިތުރުވެފައިވެއެވެ.