ވީޑިއޯ ކޮންފަރެންސް މެދުވެރިކޮށް ކުރިއަށް ގެންދާ އަޑުއެހުންތައް ވީޑިއޯ ކޮންފަރެންސް ނިޒާމަށް ދިމާވި ފަންނީ މައްސަލައެއްގެ ސަބަބުން އިއްޔެ މެދުކެނޑިއްޖެއެވެ. މި މައްސަލަ ޙައްލުކޮށް އަޑުއެހުންތައް ފެށުމަށްޓަކައި ކަމާބެހޭ ފަރާތްތަކުން މިހާރުދަނީ މަސައްކަތްކުރަމުންނެވެ. ވީޑިއޯ ކޮންފަރެންސް މެދުވެރިކޮށް ޑްރަގް ކޯޓުގެ ޝަރީޢަތް ހިންގުމުގެ ގަވާއިދު 13 މެއި 2013 ގައި ދިވެހި ސަރުކާރުގެ ގެޒެޓްގައި ޝާއިޢުކުރި ދުވަހުން ފެށިގެން ޑްރަގް ކޯޓަށް ހުށަހެޅޭ މައްސަލަތަކުގައި ހިމެނޭ ކ. މާފުށީ ޖަލުގައި

ޙުކުމްތަންފީޛުކުރަމުންދާ މީހުންގެ މައްސަލަތައް ކުރިއަށް ގެންދަނީ ވީޑިއޯ ކޮންފަރެންސް މެދުވެރިކޮށެވެ. އަދި އެ ތާރީޚުގެ ކުރިން ޑްރަގް ކޯޓަށް ހުށަހެޅޭ މައްސަލަތަކުގައި ހިމެނޭ ކ. މާފުށީ ޖަލުގައި ޙުކުމްތަންފީޛުކުރަމުންދާ މީހުންގެ މައްސަލަތަކުގެ އިބްތިދާއީ އަޑުއެހުންތައް 24 ފެބްރުއަރީ 2013 ދުވަހުގައި ފެށިފައިވެއެވެ.

ވީޑިއޯ ކޮންފަރެންސް ނިޒާމަށް ދިމާވެފައިވާ މައްސަލަ ޙައްލުކުރެވެންދެން، މާފުށީ ޖަލުގައި ޙުކުމްތަންފީޛުކުރަމުންދާ މީހުންގެ މައްސަލަތައް ކުރިއަށްގެންދާނީ ޢާންމު އުސޫލުން އެފަރާތްތައް ޑްރަގް ކޯޓަށް ޙާޟިރުކޮށްގެންނެވެ.