އޯގަސްޓް
2013
ފަރުވާގެ ޕްރޮގްރާމު ހަތަރު މީހަކު ފުރިހަމަކޮށްފި
ޑްރަގް ކޯޓުގެ ފަރުވާގެ ޕްރޮގްރާމުގައި ބައިވެރިކޮށްފައިވާ 04 މީހަކު އެ މީހުން ބައިވެރިކޮށްފައިވާ ފަރުވާގެ ޕްރޮގްރާމު ފުރިހަމަކުރުމާއެކު އެ މީހުންގެ މައްޗަށް ކޮށްފައިވާ ފުރަތަމަ ޙުކުމް ބާޠިލުކުރުމަށްފަހު މިނިވަންކުރުމަށް މިއަދު ކޯޓުން ފަހުގެޙުކުމްކޮށްފިއެވެ. މިއަދު ފަހުގެ ޙުކުމް ކުރި މީހުންނަކީ މ. ބަނަފްސާވިލާ މޫސާ އަދުދާނުއާއި ދ. ހުޅުދެލި ކަރަންކާގެ އިބްރާހިމް ސިރާޖު އާއި މ. ހެޕީ ބީޗް އަޙްމަދު އަބޫބަކުރުއާއި މ. އެތުމާ ޢަލީ އަޝްރަފު އެވެ.
މި މީހުންގެ ތެރެއިން މޫސާ ޢަދުދާނުގެ ތަންފީޛުކުރަމުންދިޔަ 06 އަހަރުދުވަހަށް ޖަލަށްލުމުގެ ޙުކުމާއި، އިބްރާހީމް ސިރާޖު ތަންފީޛުކުރަމުންދިޔަ 25 އަހަރަށް ޖަލަށްލުމުގެ ޙުކުމާއި، އަޙްމަދު އަބޫބަކުރު ތަންފީޛުކުރަމުންދިޔަ 10 އަހަރަށް ޖަލަށްލުމުގެ ޙުކުމްވަނީ ބާޠިލުކުރެވިފައެވެ. ޢަލީ އަޝްރަފުގެ މައްސަލާގައި ބާޠިލުކުރެވިފައިވަނީ ޑްރަގް ކޯޓުން އޭނާގެ މައްޗަށް ކޮށްފައިވާ 03 އަހަރު ދުވަހުގެ މުއްދަތަށް ޖަލަށް ލުމުގެ ޙުކުމެވެ.