ޑްރަގް ކޯޓުގެ ނަންބަރު 443/ DC/2012 ޤަޟިއްޔާގައި ސ. ފޭދޫ ފޫޅުމާގެއާގެ ޢަލީ ނަސީމްގެ މައްޗަށް ކޮށްފައިވާ ރީހެބިލިޓޭޝަން އަމުރުގެ މުއްދަތުގައި އޭނާ ދެފަހަރު ކުށްކޮށްފައިވާތީ، ޑްރަގް ކޯޓުގެ ފަރުވާގެ ޕްރޮގްރާމުގައި ބައިވެރިވާ މީހުންގެ މައްޗަށް ކުރެވޭ ޝަރުޠުތަކާއި އެ ޝަރުޠުތަކާ ޚިލާފުވުމުން އެޅޭނެ ފިޔަވަޅުތައް ބަޔާންކުރާ ގަވާއިދުގެ 6 ވަނަ މާއްދާގެ (ހ)ގެ 2 ވަނަ ނަންބަރުގެ ދަށުން މިއަދު އަލީ ނަސީމް ފަރުވާގެ ޕްރޮގްރާމުން ވަކިކޮށްފިއެވެ.

އަލީ ނަސީމް ފުރަތަމަ ފަހަރު ކުށެއް ކުރުމާއެކު، އެ ގަވާއިދުގެ ދަށުން އޭނާވަނީ ސަތޭކަ ރުފިޔާއިން ޖޫރިމަނާކޮށްފައެވެ. ޑްރަގް ކޯޓުގެ ފަރުވާގެ ޕްރޮގްރާމުގައި ބައިވެރިވާ މީހުންގެ މައްޗަށް ކުރެވޭ ޝަރުޠުތަކާއި އެ ޝަރުޠުތަކާ ޚިލާފުވުމުން އެޅޭނެ ފިޔަވަޅުތައް ބަޔާންކުރާ ގަވާއިދު ބުނާގޮތުން އިތުރުކުށެއްކުރުމަކީ، އެކަށީގެންވާ ހެއްކާއި ގަރީނާގެ މައްޗަށް ބިނާކޮށް  ޖިނާއީ ތަޙްޤީޤުކުރާ އިދާރާއަކުން ޖިނާއީ ކުށެއްގެ ތުހުމަތު ކުރުމެވެ.