ޑްރަގް ކޯޓުން ފަރުވާގެ ޕްރޮގްރާމުގައި ބައިވެރިކޮށްފައިވާ އިތުރު 02 މީހަކު އެ މީހުން ބައިވެރިކޮށްފައިވާ ފަރުވާގެ ޕްރޮގްރާމު ފުރިހަމަކުރުމާއެކު އެ މީހުންގެ މައްޗަށް ކޮށްފައިވާ ފުރަތަމަ ޙުކުމް ބާޠިލު ކުރުމަށްފަހު މިނިވަން ކުރުމަށް ކޯޓުން ފަހުގެ ޙުކުމް ކޮށްފިއެވެ. މިއަދު ފަހުގެ ޙުކުމް ކުރެވިފައިވަނީ ކ.ގުރައިދޫ އާގޭ އަޙްމަދު ނޫރު އާއި،  ށ.ކަނޑިތީމު ކެމެރާ، ޢަބްދުﷲ ރަޝީދުގެ މައްޗަށެވެ.

މީގެތެރެއިން އަހްމަދު ނޫރު ފަރުވާ ޕްރޮގްރާމްގައި ބައިވެރިކޮށްފައިވަނީ 16 ޖަނަވަރީ 2013 ގައެވެ. އަދި ޢަބްދުﷲ ރަޝީދު ބައިވެރިކޮށްފައިވަނީ 02 އޭޕްރީލް 2013 ގައެވެ.

އަޙްމަދު ނޫރު ބައިވެރިކޮށްފައިވަނީ ޑްރަގް ޓްރީޓްމަންޓް އެންޑް ރީހެބިލިޓޭޝަން ސެންޓަރުގެ ފަރުވާ ޕްރޮގެރާމްގައެވެ. އަދި ޢަބްދުﷲ ރަޝީދު ބައިވެރިކޮށްފައިވަނީ ކޮމިއުނިޓީ ރީހެބިލިޓޭޝަން ފަރުވާ ޕްރޮގްރާމްގައެވެ.

އަޙްމަދު ނޫރު ތަންފީޛު ކުރަމުންދިޔަ 03 އަހަރު ދުވަހުގެ މުއްދަތަށް ޖަލަށްލުމުގެ ޙުކުމާއި ޢަބްދުﷲ ރަޝީދު ތަންފީޛު ކުރަމުންދިޔަ 03 އަހަރު ދުވަހަށް ޖަލަށްލުމުގެ ޙުކުމްވެސް ވަނީ ބާޠިލުކޮށްފައެވެ.