ޑްރަގް ކޯޓުން ފަރުވާގެ ޕްރޮގްރާމުގައި ބައިވެރިކޮށްފައިވާ އިތުރު 03 މީހަކު އެ މީހުން ބައިވެރިކޮށްފައިވާ ފަރުވާގެ ޕްރޮގްރާމު ފުރިހަމަކުރުމާއެކު އެ މީހުންގެ މައްޗަށް ކޮށްފައިވާ ފުރަތަމަ ޙުކުމް ބާޠިލު ކުރުމަށްފަހު މިނިވަން ކުރުމަށް ކޯޓުން ފަހުގެ ޙުކުމް ކޮށްފިއެވެ. މިއަދު ފަހުގެ ޙުކުމް ކުރެވިފައިވަނީ ހ.ބާދަލް އިޙްސާން ޙުސައިން އާއި،  ބ.އޭދަފުށީ ތާރީފް، ޝާމިން އަޙްމަދު އަދި ގދ.ފިޔޯރީ، ބަށިގެ އަޙްމަދު އަމްސޫދުގެ މައްޗަށެވެ.

މީގެތެރެއިން އިޙްސާން ޙުސައިން ފަރުވާ ޕްރޮގްރާމްގައި ބައިވެރިކޮށްފައިވަނީ 01 އޭޕްރީލް 2013 ގައެވެ. އަދި ޝާމިން އަޙްމަދު ބައިވެރިކޮށްފައިވަނީ 12 މާރޗް 2013 ގައެވެ. އަދި އަޙްމަދު އަމްސޫދު ބައިވެރިކޮށްފައިވަނީ 27 ފެބްރުއަރީ 2013 ގައެވެ.

އިޙްސާން ޙުސައިން އާއި ޝާމިން އަޙްމަދު އަދި އަޙްމަދު އަމްސޫދު ވެސް ބައިވެރިކޮށްފައިވަނީ ޑްރަގް ޓްރީޓްމަންޓް އެންޑް ރީހެބިލިޓޭޝަން ސެންޓަރުގެ 03 މަހުގެ ފަރުވާ އާއި ކޮމިޔުނިޓީ ރީހެބިލިޓޭޝަން 03 މަހުގެ ފަރުވާ ޕްރޮގްރާމްގައެވެ.

އިޙްސާން ޙުސައިން ތަންފީޛު ކުރަމުންދިޔަ 10 އަހަރު ދުވަހުގެ މުއްދަތަށް ޖަލަށްލުމުގެ ޙުކުމާއި ޝާމިން އަޙްމަދު ތަންފީޛު ކުރަމުންދިޔަ 03 އަހަރު ދުވަހުގެ މުއްދަތަށް ޖަލަށްލުމުގެ ޙުކުމާއި އަދި އަޙްމަދު އަމްސޫދު ތަންފީޛު ކުރަމުންދިޔަ 03 އަހަރު ދުވަހުގެ މުއްދަތަށް ޖަލަށްލުމުގެ ޙުކުމްވެސް ވަނީ ބާޠިލުކޮށްފައެވެ.