ކުރިއަށް އޮތް ފަސް އަހަރަށް އަމާޒުކޮށްގެން ތައްޔާރުކުރެވިފައިވާ ޑްރަގް ކޯޓުގެ ހިންގުމާއި ތަރައްޤީގެ އޮނިގަނޑު ދިވެހިރާއްޖޭގެ އުއްތަމަ ފަނޑިޔާރު އަލްއުސްތާޛު އަޙްމަދު ފާއިޒް ޙުސައިން ރޭ އިފްތިތާޙް ކޮށްދެއްވައިފިއެވެ. މި އޮނިގަނޑު އިފްތިތާޙްކުރުމުގެ ޙަފްލާ ބޭއްވިފައިވަނީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންގެ ޓްރެއިނިންގ ރޫމްގައެވެ.

މި ޙަފްލާގައި ވާހަކަފުޅު ދައްކަވަމުން ޝަރުޢީ ދާއިރާގެ ސްޓްރެޓެޖިކް އެކްޝަން ޕްލޭންގެ ދަށުން ޙާޞިލުކުރެވިފައިހުރި މައިގަނޑު ކަންކަމަށާއި، ޑްރަގް ކޯޓުގެ ހިންގުމާއި ތަރައްގީގެ އޮނިގަނޑުގެ ދަށުން ކާމިޔާބުކަމާއެކު، ކޯޓުގެ މަސައްކަތްތައް ކުރެވިގެންދާނެ ކަމަށް އުއްތަމަ ފަނޑިޔާރު ވިދާޅުވެފައިވެއެވެ. އުއްތަމަ ފަނޑިޔާރުގެ އިތުރުން، ޑްރަގް ކޯޓު ހިންގުމާ ޙަވާލުވެހުންނެވި ޤާޟީ އަލްއުސްތާޛު މަހާޒު އަލީ ޒާހިރުވަނީ ކޯޓުގެ ހިންގުމާއި ތަރައްގީގެ އޮނިގަނޑުގައިވާ މައިގަނޑު ސިޔާސަތުތަކާއި، މިހާރު ކޯޓު ތަރައްގީކުރުމަށް ކުރެވެމުންދާ މަސައްކަތްތަކުގެ މައްޗަށް ވާހަކަފުޅު ދައްކަވާފައެވެ.