ޑްރަގް ކޯޓުން ފަރުވާގެ ޕްރޮގްރާމުގައި ބައިވެރިކޮށްފައިވާ އިތުރު 03 މީހަކު އެ މީހުން ބައިވެރިކޮށްފައިވާ ފަރުވާގެ ޕްރޮގްރާމު ފުރިހަމަކުރުމާއެކު އެ މީހުންގެ މައްޗަށް ކޮށްފައިވާ ފުރަތަމަ ޙުކުމް ބާޠިލު ކުރުމަށްފަހު މިނިވަން ކުރުމަށް ކޯޓުން ފަހުގެ ޙުކުމް ކޮށްފިއެވެ. މިއަދު ފަހުގެ ޙުކުމް ކުރެވިފައިވަނީ އއ.އުކުޅަސް، ނޫމަރަކަ ޢަބްދުﷲ ނަވާޛް އާއި ކ.މާލޭ މ.އޮނިގަނޑު، އަޙްމަދު ނަތާފް ނާފިޢު އަދި ގދ.ވާދޫ ދޮންބަގީޗާގޭ، ނަޞްރު އަޙްމަދުގެ މައްޗަށެވެ.

މީގެތެރެއިން ޢަބްދުﷲ ނަވާޛް ފަރުވާ ޕްރޮގްރާމްގައި ބައިވެރިކޮށްފައިވަނީ 06 އޮގަސްޓް 2013 ގައެވެ. އަޙްމަދު ނަތާފް ނާފިޢު ބައިވެރިކޮށްފައިވަނީ 07 މެއި 2013 ގައެވެ. އަދި ނަޞްރު އަޙްމަދު ބައިވެރިކޮށްފައިވަނީ 17 ޖުލައި 2013 ގައެވެ.

ޢަބްދުﷲ ނަވާޛް ބައިވެރިކޮށްފައިވަނީ އިންޑިވިޖުއަލް ޓްރީޓްމަންޓް 03 މަސް ދުވަހުގެ ފަރުވާ ޕްރޮގްރާމްގައެވެ. އަޙްމަދު ނަތާފް ނާފިޢު އާއި ނަޞްރު އަޙްމަދު ބައިވެރިކޮށްފައިވަނީ ޑްރަގް ޓްރީޓްމަންޓް އެންޑް ރީހެބިލިޓޭޝަން ސެންޓަރުގެ 03 މަސްދުވަހުގެ ފަރުވާ އާއި ކޮމިޔުނިޓީ ރީހެބިލިޓޭޝަން 03 މަސް ދުވަހުގެ ފަރުވާ ޕްރޮގްރާމްގައެވެ.

ޢަބްދުﷲ ނަވާޛް ތަންފީޛު ކުރަމުންދިޔަ 03 އަހަރު ދުވަހުގެ މުއްދަތަށް ޖަލަށްލުމުގެ ޙުކުމާއި އަޙްމަދު ނަތާފް ނާފިޢު ތަންފީޛު ކުރަމުންދިޔަ 06 އަހަރު ދުވަހުގެ މުއްދަތަށްޖަލަށްލުމުގެ ޙުކުމާއި 03 އަހަރާއި 06 މަސް ދުވަހުގެ މުއްދަތަށް ޖަލަށްލުމުގެ ޙުކުމާއި ނަޞްރު އަޙްމަދު ތަންފީޛު ކުރަމުން ދިޔަ 03 އަހަރު ދުވަހުގެ މުއްދަތަށް ޖަލަށްލުމުގެ ޙުކުމްވެސް ވަނީ ބާޠިލުކޮށްފައެވެ.