ޑްރަގް ކޯޓަށް ހުށަހަޅަން ޖެހޭ ކަންކަން މައިގަނޑު ގޮތެއްގައި ހުށަހެޅެނީ އެ ކަމަށް ޚާއްޞަ ކުރެވިފައިވާ ފޯމުންނެވެ. އޭގެ ތެރޭގައި، އިންޑިކޭޓިވް އެސެސްމަންޓް ރިޕޯޓު ހަދައި ނިމުމުގެ ކުރިން މާލެއިން ފުރައިގެންދިޔުމުގެ ހުއްދައަށް އެދުމާއި، ފަރުވާގެ ޕްރޮގްރާމަށް ބަދަލުގެނައުމާއި، ވަކީލަކު ޢައްޔަން ކުރުމާއި، ރާއްޖެއިން ބޭރުގެ މަރުކަޒަކުން ފަރުވާ ހޯދުމަށް އެދުން ފަދަ ކަންކަން ހިމެނެއެވެ.

ޑްރަގް ކޯޓުގެ ކަމަކާ ގުޅިގެން ކަމެއް ސާފުކުރައްވަން ބޭނުންފުޅު ނަމަ، މި ސައިޓު މެދުވެރިކޮށް ހުށަހެޅުމުން އެ ކަމުގައި ކަންތައް ކުރިއަށްދާ ގޮތް ވީ އެންމެ އަވަހަކަށް ސާފުކޮށްދިނުމަށް އަޅުގަނޑުމެން މަސައްކަތްކުރާނަމެވެ. ސައިޓުން ދޭ މަޢުލޫމާތުން ބޭނުންވާ މަޤްޞަދު ޙާޞިލު ނުވާ ނަމަ، ގުޅުއްވައިގެން ނުވަތަ ކޯޓަށް ވަޑައިގެން އެ ކަމެއް ސާފުކޮށްލެވިދާނެއެވެ.

ޑްރަގް ކޯޓުން ބަލާ މައްސަލަތަކުގެ ތެރޭގައި ހިމެނެނީ 4 ބާވަތެކެވެ. އެއީ މަސްތުވާތަކެތި ބޭނުންކުރުމާއި، މަސްތުވާތަކެތި ޕެޑްލްކުރުމާއި، މަސްތުވާތަކެތީގެ ނުފޫޒުގައި ހުރެގެން ކުރާ ޖިނާއީ ކުށުގެ މައްސަލައާއި، މަސްތުވާތަކެތީގެ މައްސަލައިގައި ޙުކުމް ތަންފީޒުކުރަމުންދާ މީހުންގެ މައްސަލައެވެ. މިއިން ކޮންމެ ބާވަތެއް ވެސް ކޯޓަށް ބަލައިގަތުމުގައި ޚާއްޞަ އިތުރު ޝަރުޠުތަކެއް ބޭނުންވެއެވެ.

ޑްރަގް ކޯޓަށް ހުށަހެޅޭ މައްސަލަތަކުގައި ދަޢުވާ ލިބޭ މީހުން ފުރިހަމަކުރަން ޖެހޭ ފަރުވާގެ ޕްރޮގްރާމުތަކަކީ ނޭޝަނަލް ޑްރަގް އޭޖެންސީން ތައްޔާރުކުރާ ޕްރޮގްރާމުތަކެކެވެ. މީގެ ތެރޭގައި މައިގަނޑު ގޮތެއްގައި ހިމެނެނީ ދެ ބާވަތެއްގެ ޕްރޮގްރާމެކެވެ. އެއީ ފަރުވާދޭ ސެންޓަރުގައި ތިބެގެން ކުރިއަށް ގެންދެވޭ އިންހައުސް ޕްރޮގްރާމުތަކާއި، މުޖުތަމަޢުގައި ތިބިގެން ކުރިއަށް ގެންދެވޭ ޕްރޮގްރާމުތަކެވެ.