ޑްރަގް ކޯޓު ، ޢިއްޒުއްދީންމަގު, 20324
އާދީއްތަ - ބުރާސްފަތި 08:00 - 14:00
މި ޞަފުޙާއިން ފެނިވަޑައިގަންނަވާނީ ޑްރަގް ކޯޓުގެ ތާރީޚުގައި ހިނގާފައިވާ މުހިންމު ކަންކަމެވެ.
ޤާނޫނު ނަންބަރު 2011/17 (މަސްތުވާތަކެއްޗާ ބެހޭ ޤާނޫނު) އަށް 31 ޑިސެމްބަރު 2011 ގައި ޢަމަލުކުރަން ފެށުމާއެކު، ޑްރަގް ކޯޓު އުފެދުނު ކަމަށް ކަނޑައެޅުނެވެ. ޑްރަގް ކޯޓު އުފެދުނު ތާރީޚު ކަމުގައި، މި ތާރީޚު ބަލަނީ، ޤާނޫނުގެ 34 ވަނަ މާއްދާގެ (ހ) ގައިވާ ނައްޞަށް ރިޢާޔަތް ކޮށްގެންނެވެ.
ޑްރަގް ކޯޓަށް އެންމެ ފުރަތަމަ ޢައްޔަން ކުރެވުނު 5 ފަނޑިޔާރުން، ފަނޑިޔާރުކަމުގެ ހުވާ ކުރެއްވީ 23 ފެބްރުއަރީ 2012 ގައެވެ. މި ފަނޑިޔާރުންނަކީ އަލްއުސްތާޛު މަޙާޒް ޢަލީ ޒާހިރުއާއި، އަލްއުސްތާޛު ޙުސައިން ޝަހާމަތު މާހިރުއާއި، އަލްއުސްތާޛު ޒުބައިރު މުޙައްމަދުއާއި، އަލްއުސްތާޛު ޢަބްދުއްސައްތާރު ޢަބްދުލްޙަމީދުއާއި އަލްއުސްތާޛު މުޙައްމަދު ޢީސާފުޅެވެ.
މަސްތުވާތަކެއްޗާ ބެހޭ ޤާނޫނުގެ 34 ވަނަ މާއްދާގެ ދަށުން، ޑްރަގް ކޯޓު ހިންގުމަށް ބޭނުންވާ ޤަވާޢިދު އެކުލަވާލައި، ގެޒެޓު ކުރެވި ޢަމަލުކުރަން ފެށުނީ 26 މާޗު 2012 ގައެވެ. އެހެންކަމުން، މި ތާރީޚަކީ، ޤާނޫނުގައި ބުނެފައިވާ ފަދައިން، ކޯޓު ހިނގަން ފެށި ދުވަސްކަމުގައި ވެސް ކަނޑައެޅިގެންދިޔައެވެ.
ޑްރަގް ކޯޓުގެ ވެބްސައިޓު އިފްތިތާޙުކޮށް ޚިދުމަތް ދޭން ފެށުނީ 26 ޖޫން 2012 ގައެވެ. ޑްރަގް ކޯޓު އެވަގުތު ހިންގަމުން ގެންދިޔަ ފަންހިޔާ ބިލްޑިންގުގައި ބޭއްވުނު ރަސްމިއްޔާތުގައި، ސައިޓު އިފްތިތާޙު ކޮށްދެއްވީ އޭރުގެ އުއްތަމަ ފަނޑިޔާރު އަލްއުސްތާޛު އަޙްމަދު ފާއިޒު ޙުސައިންއެވެ.
ޑްރަގް ކޯޓު ހިނގައިގަތުމަށް ފަހު، އެންމެ ފުރަތަމަ ފަހަރަށް މީހެއްގެ މައްޗަށް ފުރަތަމަ ޙުކުމާއި ރީހެބިލިޓޭޝަން އަމުރެއް ކުރެވުނެވެ. ޙުކުމު ކުރެއްވީ ޤާޟީ އަލްއުސްތާޛު މަޙާޒު ޢަލީ ޒާހިރެވެ. ޤާޟީގެ ސެކްޝަނަކީ ޑީ-1 އެވެ.
ފަންހިޔާ ބިލްޑިންގ ގައި ވަގުތީ ގޮތުން ޑްރަގް ކޯޓު ހިންގަމުން ގޮސް، ޢިއްޒުއްދީނު މަގުގައި މިހާރު ޑްރަގް ކޯޓު ހުރި ޢިމާރާތަށް ރަސްމީކޮށް ބަދަލުވީ 12 ނޮވެމްބަރު 2012 ގައެވެ. ޑްރަގް ކޯޓުގެ ޢިމާރާތް ހުޅުއްވައިދެއްވީ އޭރުގެ ރައީސުލް ޖުމްހޫރިއްޔާގެ ނާއިބު އައްނަބީލު މުޙައްމަދު ވަޙީދުއްދީނެވެ.
ނޭޝަނަލް ޑްރަގް ކޮންޓްރޯލް ކައުންސިލަށް (އެންޑީސީސީއަށް) ޑްރަގް ކޯޓުން ފުރަތަމަ ފަހަރަށް އަހަރީ ރިޕޯޓު ހުށަހެޅީ 16 ޑިސެމްބަރު 2012 ގައެވެ. މި ރިޕޯޓުގައި ހިމެނުނު މައުލޫމާތުތަކުގެ ތެރޭގައި، ޑްރަގް ކޯޓަށް ހުށަހެޅުނު މައްސަލަތައް ބެލުމަށް ހޭދަވި ވަގުތާއި، މައްސަލަތަކުގެ ތަފްޞީލާއި، ފަރުވާ ފުރިހަމަ ކުރި މީހުންނާއި، ފަރުވާ ފުރިހަމަ ނުކުރާ މީހުންގެ ތަފްސީލުތަކާއި، އިދާރީ ގޮތުން ކޯޓަށް ދިމާވެފައިވާ ދަތިތައް ހިމެނެއެވެ.
އެކި ސަބަބުތަކާ ހުރެ ކޯޓަށް ހާޒިރު ނުވެވޭ ފަރާތްތަކުގެ އަޑުއެހުންތައް ވީޑިއޯ ލިންކު މެދުވެރިކޮށް ކުރިއަށް ގެންދިޔުން ފެށިގެން ދިޔައީ 24 ފެބްރުއަރީ 2013 ގައެވެ. އެންމެ ފުރަތަމަ މި ގޮތަށް އަޑުއެހުމެއް ބޭއްވުނީ ކ.މާފުށީ މެޖިސްޓްރޭޓު ކޯޓާއި ޑްރަގް ކޯޓާ ވީޑިއޯލިންކުން ގުޅާލައިގެންނެވެ.
ޑްރަގް ކޯޓުގެ ފަރުވާގެ ޕްރޮގްރާމު ކާމިޔާބުކަމާއެކު ފުރިހަމަ ކުރާ ފަރާތްތަކުން ހޯދާ ކާމިޔާބު ފާހަގަކޮށް އެކަމުގެ އަގުވަޒަންކުރުމުގެ ގޮތުން އެންމެ ފުރަތަމަ ރަސްމިއްޔާތެއް ބޭއްވުނީ 27 ޖޫން 2013 ގައެވެ. މި ރަސްމިއްޔާތު ބޭއްވުނީ ޑްރަގް ކޯޓުގެ ޑީ-2 ސެކްޝަނުގެ ޝަރީޢަތް ކުރާ މާލަމުގައެވެ.
ޑްރަގް ކޯޓަށް ހުށަހެޅޭ މައްސަލަތަކުގައި ހިމެނޭ މީހުން ފުލުހުންގެ ހައްޔަރުގައި ތިބިކަން ބެލުމަށާއި، އެމީހުން އިތުރަށް ކުށް ކުރަމުންދޭ ތޯ ބެލުން އަވަސްކުރުމުގެ ބޭނުމަށް، ފުލުހުންނާއި ޑްރަގް ކޯޓާ ދެމެދު ވެބް ޕޯޓަލްއެއް ގާއިމުކޮށް އޭގެ ޚިދުމަތް ދޭން ފެށުނީ 3 ފެބްރުއަރީ 2014 ގައެވެ.
ޑްރަގް ކޯޓަށް އެންމެ ފުރަތަމަ ފަހަރަށް އިސްޤާޟީއެއް ޢައްޔަން ކުރެވުނީ 28 މެއި 2018 ގައެވެ. އިސްޤާޟީގެ ގޮތުގައި ޢައްޔަންކުރެވުނީ ޤާޟީ އަލްއުސްތާޛު ޢަބްދުއްސައްތާރު ޢަބްދުލްޙަމީދެވެ. މި ތާރީޚާ ހަމައަށް، ކޯޓު ހިންގަމުން ގޮސްފައިވަނީ، ވަގުތީ ގޮތުން ކޯޓު ހިންގެވުމާ ކޯޓުގެ ޤާޟީން ކުރެ ޤާޟީއަކާ ޙަވާލުކުރައްވައިގެންނެވެ.