ރީހެބިލިޓޭޝަން އަމުރުގެ މުއްދަތުގައި ދެފަހަރު ކުށްކޮށްފައިވާތީ ގދ. ތިނަދޫ ޓެއިލަރ މުޙައްމަދު ފަޒްލީލް ފަރުވާގެ ޕްރޮގްރާމުން މިއަދު ވަކިކޮށްފިއެވެ. އޭނާ ވަކިކޮށްފައިވަނީ ޑްރަގް ކޯޓުގެ ފަރުވާގެ ޕްރޮގްރާމުގައި ބައިވެރިވާ ފަރާތްތަކުގެ މައްޗަށް ކުރެވޭ ޝަރުޠުތަކާއި، އެ ޝަރުޠުތަކާ ޚިލާފުވުމުން އެޅޭނެ ފިޔަވަޅުތައް ބަޔާންކުރާ ގަވާއިދުގެ 6 ވަނަ މާއްދާގެ (ހ)ގެ 2 ވަނަ ނަންބަރާ ޙަވާލާދީ، މަސްތުވާތަކެއްޗާބެހޭ ޤާނޫނުގެ 82 ވަނަ މާއްދާގެ (ށ) ގެ ދަށުންނެވެ.

މުޙައްމަދު ފަޒްލީލް ފަރުވާގެ މުއްދަތުގައި މަސްތުވާތަކެތި ބޭނުންކޮށް އެތަކެތި ގެންގުޅުމުގެ ކުށުގެ ތުހުމަތުގައި ދެފަހަރު ފުލުހުން ބަންދުކޮށްފައިވެއެވެ. އަދި މިއިން ކޮންމެ ފަހަރަކު ކްރިމިނަލް ކޯޓުން އޭނާގެ ބަންދުގެ މުއްދަތު އިތުރުކޮށްފައިވެއެވެ. ފަރުވާގެ ޕްރޮގްރާމެއްގައި ބައިވެރިކޮށްފައިވާ މީހަކު ކުށެއް ކުރިކަމުގައި ބެލެވޭނީ ފުލުހުން އެމީހަކު ޖިނާއީ ކުށެއްގެ ތުހުމަތުގައި ބަންދުކުރުމުންނެވެ.