ޑްރަގް ކޯޓުން ފަރުވާގެ ޕްރޮގްރާމުގައި ބައިވެރިކޮށްފައިވާ އިތުރު ދެ މީހަކު ފަރުވާގެ ޕްރޮގްރާމު ފުރިހަމަކުރުމާއެކު އެ މީހުންގެ މައްޗަށް ކޮށްފައިވާ ފުރަތަމަޙުކުމް ބާޠިލު ކުރުމަށްފަހު މިނިވަން ކުރުމަށް ކޯޓުން ފަހުގެޙުކުމް ކޮށްފިއެވެ. ފަހުގެޙުކުމް ކުރެވިފައިވަނީ ފ.ބިލެތްދޫ ސޯސަންވިލާ، ޙުސައިން ސަހުލް އާއި ކ.މާލެ ހ.ގޯލްޑްވިލެޖް، މޫސާ އަޙްމަދު މަނިކުގެ މައްޗަށެވެ.

ޙުސައިން ސަހުލް ފަރުވާ ޕްރޮގްރާމްގައި ބައިވެރިކޮށްފައިވަނީ 10 އޮކްޓޯބަރ 2013 ގައެވެ. އަދި މޫސާ އަޙްމަދު މަނިކު ފަރުވާ ޕްރޮގްރާމްގައި ބައިވެރިކޮށްފައިވަނީ 07 ޖުލައި 2013 ގައެވެ. ޙުސައިން ސަހުލް ބައިވެރިކޮށްފައިވަނީ ކޮމިޔުނިޓީ ރީހެބިލިޓޭޝަން 06 މަސް ދުވަހުގެ ފަރުވާ ޕްރޮގްރާމްގައެވެ. މޫސާ އަޙްމަދު މަނިކު ބައިވެރިކޮށްފައިވަނީ ޑްރަގް ޓްރީޓްމަންޓް އެންޑް ރީހެބިލިޓޭޝަން ސެންޓަރުގެ ފަރުވާ ޕްރޮގްރާމް ފުރިހަމަ ކުރުމަށްފަހު ކޮމިޔުނިޓީ ރީހެބިލިޓޭޝަން 03 މަސް ދުވަހުގެ ފަރުވާ ޕްރޮގްރާމްގައެވެ. އަދި ޙުސައިން ސަހުލް ތަންފީޛު ކުރަމުންދިޔަ 03 އަހަރު ދުވަހުގެ މުއްދަތަށްޖަލަށްލުމުގެ ޙުކުމާއި މޫސާ އަޙްމަދު މަނިކު ތަންފީޛު ކުރަމުންދިޔަ 03 އަހަރު ދުވަހުގެ މުއްދަތަށް ޖަލަށްލުމުގެ ޙުކުމްވެސް ވަނީ ބާޠިލުކޮށްފައެވެ.