ޑްރަގްކޯޓުގެ 2014 ވަނަ އަހަރުގެ އަހަރީ ޙަފްލާ 30 އޭޕްރީލް 2015 ވީ ބުރާސްފަތި ދުވަހު ބާއްވައިފިއެވެ.

ޙަފްލާގައި 2014 ވަނަ އަހަރު ޑްރަގް ކޯޓުގެ ނަމޫނާ މުވައްޒަފާއި ހާޒިރީއަށް އެންމެ ރަނގަޅު މުވައްޒަފުގެ އިތުރުން ޕާފޯމަންސް އެޕްރެއިޒަލު ފޯމުން 70 އިންސައްތައަށް ވުރެ މަތިން ހޯދާފައިވާ މުވައްޒަފުންނަށް ހަނދާނީ ލިޔުމާއި ޓްރޮފީ ދީފައިވެއެވެ.

ފާއިތުވި އަހަރުގެ ނަމޫނާ މުވައްޒަފަށް ހޮވިފައިވަނީ އެޑްމިނިސްޓްރޭޓިވް އޮފިސަރ ހަޝްފާ ޙަސަންއެވެ. އަދި ހާޒިރީއަށް އެންމެ ރަނގަޅު މުވައްޒަފަކަށް ހޮވިފައިވަނީ އެސިސްޓެންޓް ލީގަލް އޮފިސަރ އަލްއުސްތާޛު އިބްރާހިމް ޛިހުނީއެވެ.

ކަސްޓަމްސް ބިލްޑިންގ ގެ މީރު ބަހުރު މާލަމްގައި ބޭއްވުނު މި ޙަފްލާ ޝަރަފްވެރި ކޮށްދެއްވީ މިނިސްޓަރ އޮފް ހޯމް އެފެއާޒް ޢުމަރު ނަޞީރެވެ. އެމަނިކުފާނު ދެއްކެވި ވާހަކަފުޅުގައި ފަރުވާގެ އިތުރު ފުރުޞަތުތައް ލިބިދިނުމުގެ ގޮތުން ވަރަށް އަވަހަށް އިތުރު ރީހެބިލިޓޭޝަން ސެންޓަރުތަކެއް ހުޅުވިގެންދާނެ ކަމަށާއި، ހިންމަފުށީގައި ހުންނަ ރީހެބިލިޓޭޝަން ސެންޓަރު އައުޓްސޯސް ކުރުމަށް ސަރުކާރުން ޤަޞްދު ކުރައްވާ ކަން ފާހަގަ ކުރެއްވިއެވެ.

ޑްރަގްކޯޓު ހިންގުމާ ޙަވާލުވެހުންނެވި ޤާޟީ އަލްއުސްތާޛު ޢަބްދުއްސައްތާރު ޢަބްދުލްޙަމީދު ވެސް މި ޖަލްސާގައި ވާހަކަ ދެއްކެވިއެވެ.