ޑްރަގްކޯޓުގެ ރީހެބިލިޓޭޝަން އަމުރުގެ ދަށުން ފަރުވާ ފުރިހަމަކުރި ފަރާތްތަކަށް ހަނދާނީ ލިޔުންދިނުމަށް ރަސްމިއްޔާތެއް ބާއްވައިފިއެވެ. ޝީ ބިލްޑިންގުގެ އަސަރީ މާލަމުގައި، 28 މެއި 2015 ވީ ބުރާސްފަތި ދުވަހު ބޭއްވުނު މި ޙަފުލާގައި، ފަރުވާ ފުރިހަމަކުރި ފަރާތްތަކަށް ހަނދާނީ ލިޔުން ބައްސަވައިދެއްވީ ރަސްމިއްޔާތުގެ ޝަރަފުވެރިމެހުމާނު މިނިސްޓަރ އޮފް ޔޫތު އެންޑް ސްޕޯރޓްސް އަލްފާޟިލް އަޙްމަދު ޡުހޫރެވެ.ފަރުވާ ފުރިހަމަކުރި ފަރާތްތަކުގެ ތެރެއިން 11 ފަރާތަކާއި، އެފަރާތްތަކުގެ ބެލެނިވެރިންވެސް ބައިވެރިވި މި ރަސްމިއްޔާތުގައި ޝަރަފުވެރިމެހުމާނު ދެއްކެވި ވާހަކަފުޅުގައި،

މަސްތުވާތަކެތީގެ ވަބާގައި ޖެހިފައިވާ އަދި އެނޫންވެސް އެފަދަ ޙާލަތެއް ކުރިމަތިވެފައިވާ ފަރާތްތައް ވަކިން ޚާއްޞަކޮށް ޒުވާނުން މާޔޫސްނުވުމަށް ގޮވާލައްވައި، ޒުވާނުންނަށް ކުރިއަށްދާނެ ފުރުޞަތުތައް ސަރުކާރުން ފަހިކޮށްދެއްވުމަށް ކުރައްވާ މަސައްކަތްތަކަށް އަލިއަޅުވާލެއްވިއެވެ.

މި ރަސްމިއްޔާތުގައި ޑްރަގް ކޯޓު ހިންގުމާ ޙަވާލުވެހުންނެވި ޤާޟީ އަލްއުސްތާޛު ޢަބްދުއްސައްތާރު ޢަބްދުލްޙަމީދު ވެސް ވާހަކަފުޅު ދެއްކެވިއެވެ. ޤާޟީގެ ވާހަކަފުޅުގައި، ޑްރަގް ކޯޓަށް ލިބިފައިވާ މަޢުލޫމާތުގެ މައްޗަށް ބަލާއިރު، ފަރުވާގެ ޕްރޮގްރާމުތައް ނިންމާ ފަރާތްތައް ދެވަނަ ފަހަރަށް އެނބުރި މަސްތުވާތަކެތީގެ ކުށްތަކަށް އަރައިގަންނަމުންދާކަމަށް އަދި ފާހަގަކުރެވިފައި ނުވާކަމަށާއި، ނަމަވެސް މި ކަމުގައި އެންމެ ރަނގަޅު ގޮތަކީ، މިނިވަން ނުވަތަ ކޯޓުނޫން އެހެން ފަރާތަކުން އެކަށީގެންވާ ދިރާސާއެއް ކުރުމަށްފަހު، ފަރުވާގެ ޕްރޮގްރާމުތައް ކާމިޔާބުވަމުންދާކަން ނުވަތަ ނޫންކަމާމެދު އެއްޗެއް ވިދާޅުވުންކަމަށް ދެކެވަޑައިގަންނަވާކަމަށް ވިދާޅުވިއެވެ.

ފަރުވާ ފުރިހަމަ ކުރި ފަރާތްތަކާ މުޚާތަބުކުރައްވައި އެން.ޑީ.އޭ ގެ އެސިސްޓެންޓް ކައުންސިލަރ އަލްފާޟިލް އަޙްމަދު ޙިލްމީ ވެސް މި ރަސްމިއްޔާތުގައި ވާހަކަފުޅު ދެއްކެވިއެވެ.