ޑްރަގް ކޯޓުން ކޮށްފައިވާ ރީހެބިލިޓޭޝަން އަމުރުގެ ދަށުން ކާމިޔާބު ކަމާއެކު ފަރުވާގެ ޕްރޮގުރާމު ފުރިހަމަ ކޮށްފައިވާ ފަރާތްތަކުގެ އަގުވަޒަންކޮށް ހިތްވަރު ދިނުމަށްޓަކައި ކޯޓުން ޚާއްޞަ ޙަފުލާއެއް ބާއްވައިފިއެވެ.  

ސޮލައިޓު ރެސްޓޯރަންޓުގެ  މާލަމުގައި  މި މަހުގެ 15 ވަނަ ދުވަހުގެ ރޭ  ބޭއްވުނު މި ޙަފުލާގެ ޝަރަފުވެރިމެހުމާނަކީ މިނިސްޓީ އޮފް ހޯމްލޭންޑު ސެކިއުރިޓީ އެންޑް ޓެކްނޯލޮޖީގެ ސްޓޭޓު މިނިސްޓަރ އަދި ނޭޝަނަލް ޑްރަގް އޭޖެންސީގެ ބޯޑުގެ ޗެއަރމަން އަލްއުސްތާޛާ ލުބްނާ މުޙައްމަދު ޒާހިރު ޙުސައިންއެވެ.

 2024 ވަނަ އަހަރު ފަރުވާ ނިންމި ފަރާތްތަކަށް ހަނދާނީ ލިޔުން ދެއްވުމަށް ފަހު، އެކަމަނާ  ދެއްކެވި ވާހަކަފުޅުގައި، ޑްރަގް ކޯޓުން މި ފަދަ ޙަފުލާއެއް ބާއްވައި، ފަރުވާގެ ކަންކަމުގައި ނަމޫނާ ދެއްކެވީތީ އެކަން ފާހަގަ ކުރެއްވިއެވެ. އަދި، މަސްތުވާތަކެތީގެ ވަބާއިން ސަލާމަތްވުމަށް ހިންގޭ ފަރުވާގެ ޕްރޮގްރާމުތައް ނިންމައި މުޖުތަމައަށް ނުކުންނަ މީހުންނަށް ވަޒީފާ ހޯދަން ސަރުކާރު ހިއްސާވާ ކުންފުނިތަކުން އެހީތެރިކަން ފޯރުކޮށްދޭން އެދިވަޑައިގަތެވެ. އަދި، ފަރުވާގެ ނިޒާމްގެ ހަރުދަނާ ކުރުމަށް ސަރުކާރުން ކުރާ ހޭދަ އިތުރުކުރައްވާފައިވާ ކަމަށާއި އަންނަ އަހަރަށް ލަފާ ކުރާ ބަޖެޓްގައި މިކަމަށް އިތުރު 30 މިލިއަން ރުފިޔާ ހިމަނަން ނިންމާފައިވާ ކަމަށް ވިދާޅުވިއެވެ. މީގެ އިތުރުން، ފަރުވާ ހޯދާ ފަރާތްތަކަށް މުޖުތަމަޢުގެ އެހީތެރިކަން ލިބިދިނުމުގެ މުހިންމު ކަން ވެސް އެކަމަނާ ފާހަގަ ކުރެއްވިއެވެ.

މި ޙަފުލާގައި ޑްރަގް ކޯޓުގެ އިސްޤާޟީ އަލްއުސްތާޛު ޢަބްދުއްސައްތާރު ޢަބްދުލްޙަމީދު ދެއްކެވި ވާހަކަފުޅުގައި، މަސްތުވާތަކެއްޗަށް ދެވިހިފާފައިވާ ފަރާތްތަކުން އެކަމުން ސަލާމަތްވުމަށް ކުރާ މަސައްކަތަކީ އެހާ ފަސޭހަ ކަމެއް ނޫން ކަމާއި، އެކަމުގައި ކުރިމަތިލާން ޖެހޭ ގޮންޖެހުންތައް ހުރަސްކޮށް، އަލުން މުޖުތަމަޢުއަށް ޒިންމާދާރު ގޮތެއްގައި ނުކުތުމަށް ގަދައަޅައި މަސައްކަތް ކުރާ ފަރާތްތަކަށް ހުރިހާ ފަރާތަކުން ވެސް ހިތްވަރު ދޭން ޖެހޭ ކަމަށް ވިދާޅުވިއެވެ. އަދި ޑްރަގް ކޯޓުން ފަރުވާއަށް އަމުރު ކުރި ކަމުގައި ވިޔަސް ފަރުވާދޭން ތިބި ކައުންސިލަރުންނާއި އެކަމަށް ބޭނުންވާ ވަސީލަތްތައް މަދުވުމުން، ބައެއް ފަހަރު ފަރުވާ ނުފެށި ލަސްވަމުންދާ ކަން ފާހަގަ ކުރެވޭ ކަމަށާއި، އެފަދަ ކަންކަމަށް ޙައްލު ލިބި، ފަރުވާގެ ކަންކަން އަވަހަށް ފެށި ޕްރޮގުރާމުތައް ނިމިގެން ދިޔުމަކީ މުހިންމު ކަމެއް ކަން ފާހަގަ ކުރެއްވިއެވެ.

2023 ވަނަ އަހަރުގެ ޑްރަގް ކޯޓުގެ ނަމޫނާ މުވައްޒަފަށާއި ހާޒިރީއަށް އެންމެ ރަނގަޅު ފަރާތްތަކަށް ވެސް މި ޙަފުލާގައި އިނާމާއި ހަނދާނީ ލިޔުން ދެވުނެވެ. މިދިޔަ އަހަރު ކޯޓުގެ ނަމޫނާ މުވައްޒަފަކަށް ހޮވިފައިވަނީ އެޑްމިނިސްޓްރޭޓިވް އޮފިސަރ އަލްފާޟިލާ އަދުމާ އަޙުމަދެވެ.

ޑްރަގް ކޯޓަށް ކޮށްދެއްވާފައިވާ ޚިދުމަތްތަކަށް، މަސްތުވާތަކެއްޗާ ދެކޮޅަށް މަސައްކަތް ކުރައްވާ ޢާންމު ފަރާތެއް ކަމުގައިވާ އަލްފާޟިލް ޢަލީ އަދީބަށް ވެސް މި ޙަފުލާގައި ހަނދާނީ ފިލައެއް އެރުވުނެވެ.

ޑްރަގް ކޯޓުގެ މަސައްކަތްތައް ޢާންމުންނަށް އަންގައިދީ ހޭލުންތެރިކުރުވުމަށް ކޯޓުގެ ޔޫޓިއުބު ޗެނަލެއް ވެސް މި ޙަފުލާގައި އިފްތިތާޙު ކުރެވުނެވެ.

ފަރުވާ ހޯދި ފަރާތްތަކުގެ ފަރާތުން މި ޙަފުލާގައި ވާހަކަދެއްކެވި ފަރާތުން، މަސްތުވާތަކެއްޗަށް ދެވިހިފުމުން އޭނާގެ ޙަޔާތަށް ލިބުނު އަނދިރިކަމާއި، ފަރުވާގެ ސަބަބުން  އައިސްފައިވާ ހެޔޮ ބަދަލާއި، މަސްތުން ދުރުވެހުރުމަށް ކުރާ ހިތްވަރު ފާހަގަކޮށް، މި ކަމުގައި ޑްރަގް ކޯޓުގެ ދައުރު ފާހަގަކޮށް ޝުކުރު އަދާކުރިއެވެ.

ވޭތުވެ ދިޔަ އަހަރު، ޑްރަގް ކޯޓުން 586 މީހެއްގެ މައްޗަށް ފަރުވާއަށް އަމުރުކޮށްފައިވެއެވެ. އަދި 419 ފަރާތެއް އެ އަހަރުގެ ތެރޭގައި ފަރުވާ ފުރިހަމަކޮށްފައިވެއެވެ. އަދި، ފަރުވާގެ އަމުރާ ޚިލާފުވެގެން، މިދިޔަ އަހަރުގެ ތެރޭގައި 173 ފަރާތެއް ވަނީ ފަރުވާއިން ވަކިކޮށް، ފުރަތަމަ ޙުކުމު ތަންފީޛު ކުރުމަށް އަމުރުކުރެވިފައެވެ.

މި  ޙަފުލާގައި، ޝަރަފުވެރިމެހުމާނުގެ  އިތުރުން،  ޖުޑީޝަލް  ސަރވިސް  ކޮމިޝަނުގެ  ރައީސް އަލްއުސްތާޛު ޙުސައިން ރިޟާ އާދަމާއި، ކޮމިޝަނަރ އޮފް ޕޮލިސް އަލްފާޟިލް ޢަލީ ޝުޖާޢުއާއި، ޗީފް ޖުޑީ ޝަ ލް އެޑްމިނިސްޓްރޭޓަރ އަލްއުސްތާޛާ ޢާއިޝަތު ރިޒުނާއާއި، ސުޕީރިއަރ ކޯޓުތަކުގެ އިސްޤާޟީންނާއި، ނޭޝަނަލް ޑްރަގް އޭޖެންސީގެ އެކްޓިންގ ސީ.އީ.އޯ. އަލްފާޟިލް މުޙައްމަދު  ރާޝިދުއާއި، އޭޖެންސީގެ ބޯޑުގެ މެންބަރުންނާއި، ޑްރަގް ކޯޓުގެ ޤާޟީންނާއި މުވައްޒަފުން ބައިވެރިވެވަޑައިގަތެވެ.