ޑްރަގް ކޯޓުން ފަރުވާގެ ޕްރޮގްރާމުގައި ބައިވެރިކޮށްފައިވާ އިތުރު 02 މީހަކު އެ މީހުން ބައިވެރިކޮށްފައިވާ ފަރުވާގެ ޕްރޮގްރާމު ފުރިހަމަކުރުމާއެކު އެ މީހުންގެ މައްޗަށް ކޮށްފައިވާ ފުރަތަމަ ޙުކުމް ބާޠިލު ކުރުމަށްފަހު މިނިވަން ކުރުމަށް ކޯޓުން ފަހުގެ ޙުކުމް ކޮށްފިއެވެ. މިއަދު ފަހުގެ ޙުކުމް ކުރެވިފައިވަނީ މ.ޕެރިސްވިލާ ޙަސަން ޝާހިދު އާއި، މ.ސައިލާ ޢަލީ ނާހިދުގެ މައްޗަށެވެ.

މީގެތެރެއިން ޙަސަން ޝާހިދު ފަރުވާ ޕްރޮގްރާމްގައި ބައިވެރިކޮށްފައިވަނީ 20 ފެބްރުއަރީ 2013 ގައެވެ. ޢަލީ ނާހިދު ބައިވެރިކޮށްފައިވަނީ 21 އޭޕްރީލް 2013 ގައެވެ.

ޙަސަން ޝާހިދު އާއި ޢަލީ ނާހިދު ބައިވެރިކޮށްފައިވަނީ ޑްރަގް ޓްރީޓްމަންޓް އެންޑް ރީހެބިލިޓޭޝަން ސެންޓަރުގެ 03 މަހުގެ ފަރުވާ އާއި ކޮމިޔުނިޓީ ރީހެބިލިޓޭޝަން 03 މަހުގެ ފަރުވާ ޕްރޮގްރާމްގައެވެ. ޙަސަން ޝާހިދު ތަންފީޛު ކުރަމުންދިޔަ 06 އަހަރު ދުވަހުގެ މުއްދަތަށް ޖަލަށްލުމުގެ ޙުކުމާއި 04 މަސް ދުވަހަށް ޖަލަށްލުމުގެ ޙުކުމާއި ޢަލީ ނާހިދު ތަންފީޛު ކުރަމުންދިޔަ 03 އަހަރު ދުވަހުގެ މުއްދަތަށްޖަލަށްލުމުގެ ޙުކުމްވެސް ވަނީ ބާޠިލުކޮށްފައެވެ.