ޑްރަގް ކޯޓުން ފަރުވާގެ ޕްރޮގްރާމުގައި ބައިވެރިކޮށްފައިވާ އިތުރު 02 މީހަކު އެ މީހުން ބައިވެރިކޮށްފައިވާ ފަރުވާގެ ޕްރޮގްރާމު ފުރިހަމަކުރުމާއެކު އެ މީހުންގެ މައްޗަށް ކޮށްފައިވާ ފުރަތަމަ ޙުކުމް ބާޠިލު ކުރުމަށްފަހު މިނިވަން ކުރުމަށް ކޯޓުން ފަހުގެ ޙުކުމް ކޮށްފިއެވެ. މިއަދު ފަހުގެ ޙުކުމް ކުރެވިފައިވަނީ އއ.މަތިވެރި ރީފްވިލާ، އަޙްމަދު ޖިނާޙު އާއި ލ.ގަމު މަންދަގެ، ޙަސަން ޔޫސުފްގެ މައްޗަށެވެ.

މީގެތެރެއިން އަޙްމަދު ޖިނާޙު ފަރުވާ ޕްރޮގްރާމްގައި ބައިވެރިކޮށްފައިވަނީ 27 ޖަނަވަރީ 2013 ގައެވެ. ޙަސަން ޔޫސުފް ބައިވެރިކޮށްފައިވަނީ 07 މެއި 2013 ގައެވެ.

އަޙްމަދު ޖިނާޙު ބައިވެރިކޮށްފައިވަނީ ކޮމިޔުނިޓީ ރީހެބިލިޓޭޝަން 06 މަސް ދުވަހުގެ ފަރުވާ ޕްރޮގްރާމްގައެވެ. އަދި ޙަސަން ޔޫސުފް ބައިވެރިކޮށްފައިވަނީ ޑްރަގް ޓްރީޓްމަންޓް އެންޑް ރީހެބިލިޓޭޝަން ސެންޓަރުގެ 03 މަހުގެ ފަރުވާ އާއި ކޮމިޔުނިޓީ ރީހެބިލިޓޭޝަން 03 މަހުގެ ފަރުވާ ޕްރޮގްރާމްގައެވެ.

އަޙްމަދު ޖިނާޙު ތަންފީޛު ކުރަމުންދިޔަ 03 އަހަރު ދުވަހުގެ މުއްދަތަށް ޖަލަށްލުމުގެ ޙުކުމާއި ޙަސަން ޔޫސުފް ތަންފީޛު ކުރަމުންދިޔަ 30 އަހަރު ދުވަހުގެ މުއްދަތަށްޖަލަށްލުމުގެ ޙުކުމްވެސް ވަނީ ބާޠިލުކޮށްފައެވެ.