ޑްރަގް ކޯޓުން މިހާތަނަށް ރީހެބިލިޓޭޝަން އަމުރުކޮށްފައިވާ 239 މީހުންގެ ތެރެއިން، އެ އަމުރު ކުރެވުނު ތާރީޚުގެ ފަހުން ކޮށްފައިވާ ކުށެއްގެ ތުހުމަތުގައި މޯލްޑިވްސް ޕޮލިސް ސާރވިސްގެ ބެލުމުގެ ދަށަށް މިހާތަނަށް ގެންދެވިފައިވަނީ 14 މީހެކެވެ. މިއީ، ފަރުވާ ލިބިގަތުމަށް އަންގައި ރީހެބިލިޓޭޝަން އަމުރުކުރެވިފައިވާ މީހުންގެ ގާތްގަނޑަކަށް %5 އެވެ.

މި 14 މީހުންގެ ތެރެއިން 8 މީހުންނަކީ ކޮމިއުނިޓީ ރީހެބިލިޓޭޝަން ޕްރޮގްރާމަށް ފޮނުވިފައިވާ މީހުންނެވެ. އަނެއް 6 މީހުންނަކީ ރެސިޑެންޝިއަލް ރީހެބިލިޓޭޝަން ޕްރޮގްރާމަށް އަމުރުކުރެވިފައިވާ މީހުންނެވެ. ކޮމިއުނިޓީ ފަރުވާގެ 8 މީހުންގެ ތެރެއިން 3 މީހަކު 2 ފަހަރަށް ބަންދުކުރެވިފައިވާއިރު،

ރެސިޑެންޝިއަލް ފަރުވާގެ 6 މީހުންގެ ތެރެއިން 1 އަކު 2 ފަހަރަށް، އަދި 1 އަކު 3 ފަހަރަށް ބަންދުކުރެވިފައިވެއެވެ. މީގެ ތެރެއިން 3 މީހަކު ފުލުހުންގެ ބެލުމުގެ ދަށަށް ގެންދެވިފައިވަނީ ފަރުވާދޭ ސެންޓަރަށް ނުގެންދެވި، މުޖުތަމަޢަށް ދޫވެފައިވަނިކޮށް ކޮށްފައިވާ ކުށެއްގެ ތުހުމަތުގައެވެ.

ކޮމިއުނިޓީ ރީހެބިލިޓޭޝަން ޕްރޮގުރާމަކީ މުޖުތަމަޢުގައި، ހުރެގެން ކުރިއަށް ގެންދެވޭ ޕްރޮގްރާމެކެވެ. ރެސިޑެންޝިއަލް ޕްރޮގްރާމުގައި ބޮޑު ބައެއް ހޭދަކުރަންޖެހެނީ ފަރުވާދޭ މަރުކަޒެއްގެ ތެރޭގައެވެ. އެގޮތުން މިފަދަ މީހުންނަށް މިވަގުތު ފަރުވާ ދެވެމުންދަނީ ކ.ހިންމަފުށީގައި ހުންނަ ޑްރަގް ޓްރީޓްމަންޓް އެންޑް ރީހެބިލިޓޭޝަން ސެންޓަރުގައެވެ. ޑްރަގު ކޯޓުން ކުރާ އަމުރުތަކާ އެއްގޮތަށް ފަރުވާގެ ކަންތައް ކުރިއަށްގެންގޮސްދޭންޖެހޭ ފަރާތަކީ ނޭޝަނަލް ޑްރަގް އޭޖެންސީއެވެ.

ފުލުހުންގެ ފަރާތުން ކޯޓާ ޙިއްޞާކުރައްވާފައިވާ މަޢްލޫމާތުތަކަށް ބަލާއިރު، މި މީހުން ބަންދުކުރެވިފައިވަނީ މައިގަނޑު ގޮތެއްގައި މަސްތުވާތަކެތި ބޭނުންކުރުމާއި، އެކަމާ ގުޅުންހުރި ކުށްތައް ކަމުގައި ބެލެވޭ ވައްކަންކުރުމާއި، ފޭރުންފަދަ ކަންކަމުގައެވެ. ނަމަވެސް މީގެ ތެރެއިން އެކަކު ކުޑަކުއްޖަކާމެދު ބަދުއަޚްލާޤީ ޢަމަލެއް ހިންގުމުގެ ތުހުމަތުގައިވެސް ހައްޔަރުކުރެވިފައިވެއެވެ.

ޑްރަގް ކޯޓުން ބަލާ މައްސަލަތަކުގައި ފުރަތަމަ ޙުކުމްކޮށް އެ ޙުކުމް ތަންފީޛުކުރުން އެކަހެރިކުރުމާއެކު ފަރުވާލިބިގަތުމަށް އަންގައި ކުރާ ރިހިބިލިޓޭޝަން އަމުރުގައި، ފަރުވާގެ މުއްދަތުގައި އިތުރު ކުށެއް ނުކުރުމަށް ޝަރުޠުކުރެއެވެ. އަދި މިގޮތަށް ކުށެއްކުރިކަމަށް ތުހުމަތުކުރެވިއްޖެނަމަ، އެކަމެއް ހިނގާފައިވާ ގޮތް ބެލުމަށްފަހު، ފަރުވާގެ ޕްރޮގުރާމް ހުއްޓާލުމަށް އަންގައި، އެމީހަކަށް އިއްވިފައިވާ ފުރަތަމަ ޙުކުމް ތަންފީޛުކުރަން އެންގުމުގެ ބާރު ކޯޓަށް ލިބިގެންވެއެވެ.