ނޭޝަނަލް ޑްރަގް އެޖެންސީގެ ކޮމިއުނިޓީ ސަރވިސް ސެންޓަރުގައި މަސައްކަތްކުރާ ކައުންސެލަރުން މަދުވެފައި އެ ސެންޓަރުގައި ފަރުވާހޯދަންޖެހިފައިވާ މީހުންގެ ޢަދަދު ގިނަވެފައިވާތީ، އެ ސެންޓަރުގެ ޖާގަ ފުރިފައިވާކަމަށް ނޭޝަނަލް ޑްރަގް އެޖެންސީން އަންގައިފިއެވެ. ކޮމިއުނިޓީ ސަރވިސް ސެންޓަރަކީ މުޖުތަމަޢުގައި ތިބެގެން މަސްތުވާތަކެތިން ސަލާމަތްވުމަށް ބޭނުންވާ ފަރުވާ (ކޮމިއުނިޓީ ރީހެބިލިޓޭޝަން)ގެ ޕްރޮގްރާމުތައް ހިންގާ މަރުކަޒެވެ.

މިވަގުތު އެ މަރުކަޒުގެ އެކި ފަރުވާގެ ޕްރޮގްރާމުތަކުގައި ބައިވެރިވެ ފުރިހަމަކުރުމަށް 92 މީހުންގެ މައްޗަށް ޑްރަގް ކޯޓުންވަނީ ރީހެބިލިޓޭޝަން އަމުރުކޮށްފައެވެ.

ނޭޝަނަލް ޑްރަގް އެޖެންސީގެ ކޮމިއުނިޓީ ސަރވިސް ސެންޓަރާއި، ކ. ހިންމަފުށީގައި އެ އެޖެންސީން ހިންގާ ޑްރަގް ޓްރީޓްމަންޓް އެންޑް ރީހެބިލިޓޭޝަން ސެންޓަރުގެ އިންޓޭކް މަރުޙަލާގައި ޖާގަފުރުމުން ޑްރަގް ކޯޓުގެ ރީހެބިލިޓޭޝަން އަމުރުގެ ދަށުން ވަގުތުން ފަރުވާދިނުމުގެ އިންތިޒާމު ވަނީ ހުއްޓިފައި ވީނަމަވެސް، ޑްރަގް ކޯޓުގެ އިޚްތިޞާޞް ލިބޭ 746 މީހުންގެ މައްސަލަ މިއަދުގެ ނިޔަލަށް ޑްރަގް ކޯޓުގައި ރަޖިސްޓްރީކުރެވިފައިވެއެވެ.