ނޭޝަނަލް ޑްރަގް އެޖެންސީގެ ފަރާތުން ހިންގާ ކޮމިއުނިޓީ ރީހެބިލިޓޭޝަން ސެންޓަރާއި، ޑްރަގް ޓްރީޓްމަންޓް އެންޑް ރީހެބިލިޓޭޝަން ސެންޓަރުގެ ޖާގަ ފުރިފައިވާކަން އެ އެޖެންސީން މި ކޯޓަށް އެންގުމާގުޅިގެން، ފަރުވާދިނުމުގެ ކަންކަން ހަމަނުޖެހޭ ހާލަތްތަކުގައި މަސްތުވާތަކެއްޗާބެހޭ ޤާނޫނުގެ 69 ވަނަ މާއްދާގައިވާ ގޮތުގެ މަތިން ފަރުވާލިބެންޖެހޭ މީހުން ޖަލުގައި ބަންދުކުރުމުން މަސްތުވާތަކެއްޗާބެހޭ ޤާނޫނުގެ 100 ވަނަ މާއްދާގެ (ށ)ގެ ދަށުން އެ މީހުންނަށް ޖަލުގައި ފަރުވާދެވެމުން ނުދާތީ މަސްތުވާތަކެއްޗާބެހޭ ޤާނޫނުގެ 69 ވަނަ މާއްދާއަށް ޢަމަލުކުރުމަކީ އިސްތިސްނާއީ ޙާލަތެއް ކަމުގައި ނުބަލައި ޢަމަލުކުރަމުން ދިއުމަކީ ފަރުވާދިނުމުގެ ނިޒާމާމެދު ޢާންމުން އިތުބާރު ނެތިގެން ހިނގައިދާނެ ކަމެއްކަމުގައިވާތީ ނޭޝަނަލް ޑްރަގް ކޮންޓްރޯލް ކައުންސިލްގެ ސަމާލުކަމަށް ގެނެވިއްޖެއެވެ.

މީގެ އިތުރުން، މިހާރު ޤާއިމުކުރެވިފައިވާ ފަރުވާދޭ މަރުކަޒުތަކުން ޖާގަލިބޭ މިންވަރަކުން އެ މަރުކަޒުތަކުގައި ފަރުވާހޯދުމަށް ރީހެބިލިޓޭޝަން އަމުރުތައް ނެރުމަކީ މަސްތުވާތަކެތި ބޭނުންކުރާ މީހުންގެ ނިސްބަތުން ބަލާއިރު، މަސްތުވާތަކެތި ބޭނުންކުރުމާއި ޕެޑްލްކުރުމުގެ މައްސަލައާއި، މަސްތުވާތަކެއްޗާ ގުޅިފައިވާ އެހެނިހެން އިޖުތިމާޢީ މައްސަލަތަކަށް އޮތް ޙައްލެއްކަމަށް ޤަބޫލުނުކުރެވޭކަންވެސް އެ ކައުންސިލުގެ ސަމާލުކަމަށް ގެނެވިފައިވެއެވެ.

މިވަގުތު ޑްރަގް ކޯޓުގެ އިޚްތިޞާޞް ހިނގާ 736 މީހުންގެ މައްސަލަ ރަޖިސްޓްރީކުރެވިފައިވެއެވެ. ހަމައެހެންމެ، މިއަދުގެ ނިޔަލަށް ކޮމިއުނިޓީ ރީހެބިލިޓޭޝަން 06 މަސްދުވަހުގެ ޕްރޮގްރާމުގައި ބައިވެރިވުމަށް 89 މީހުންގެ މައްޗަށް ރީހެބިލިޓޭޝަން އަމުރު ކުރެވިފައިވެއެވެ. އަދި ކޮމިއުނިޓީ ރީހެބިލިޓޭޝަން 03 މަސްދުވަހުގެ ޕްރޮގްރާމުގައި 01 މީހަކު އަދި މެތަޑޯން މެއިންޓަނެންސް ޕްރޮގްރާމުގައި 2 މީހަކު އަދި ރެސިޑެންޝަލް ރީހެބިލިޓޭޝަން ޕްރޮގްރާމުގައި ބައިވެރިކުރުމަށް 143 މީހުންގެ މައްޗަށް ރީހެބިލިޓޭޝަން އަމުރުކުރެވިފައިވެއެވެ.

ނޭޝަނަލް ޑްރަގް ކޮންޓްރޯލް ކައުންސިލަކީ، ދިވެހިރާއްޖޭގައި މަސްތުވާތަކެތި ޓްރެފިކްކުރުން ހުއްޓުވުމާއި، މަސްތުވާތަކެތީގެ ބޭނުންކުރުން ހުއްޓުވުމާއި، މަސްތުވާތަކެތި ބޭނުންކުރާ މީހުންނަށް ފަރުވާ ދިނުމާގުޅޭ ސިޔާސަތުތަކާ ބެހޭގޮތުން ރައީސުލްޖުމްހޫރިއްޔާއަށް ލަފާދޭ ފަރާތެވެ.