ޑްރަގް ކޯޓަށް ހުށަހެޅޭ މައްސަލަތަކުގައި ހިމެނޭ ގިނަ ޢަދަދެއްގެ މީހުންނަކީ ޖިނާއީ ކުށް ކުށުގެ ޙުކުމް ތަންފީޛުކުރުމުގެ ގޮތުން ކ.މާފުށީ ޖަލުގައި ތިބޭ ބަޔަކަށްވާތީއާއި، އެފަދަ މީހުން ޑްރަގް ކޯޓުގެ ޝަރީޢަތުގެ މަޖިލީހަށް ޙާޟިރުކުރުމުގައި ގޮންޖެހުންތަކެއް ކުރިމަތިވެފައިވާތީއާއި، ޝަރީޢަތްކުރުމުގައި ޒަމާނީ ޓެކްނޮލޮޖީގެ ބޭނުން ހިފުމުގެ ގޮތުން، އެކުލަވާލެވުނު ވީޑިއޯ ކޮންފަރެންސް މެދުވެރިކޮށް ޑްރަގް ކޯޓުގެ ޝަރީޢަތް ހިންގުމުގެ ގަވާއިދު ދިވެހި ސަރުކާރުގެ ގެޒެޓްގައި އިއްޔެ (27 މެއި 2013) ދުވަހު ޝާއިޢުކުރެވިއްޖެއެވެ.

ވީޑިއޯ ކޮންފަރެންސް ގަވާއިދުގެ އުސްއަލިތަކަށްބަލާއިރު، ވީޑިއޯ ކޮންފަރެންސް މެދުވެރިކޮށް ޝަރީޢަތްކުރިއަށް ގެންދަން ނިންމުމާއި، އެފަދަ ޝަރީޢަތްތަކަށް ޙާޟިރުވުމަށް އަމުރުފޮނުވުމާއި، ވީޑިއޯ ކޮންފަރެންސް މެދުވެރިކޮށް ކުރާ ޝަރީއަތުގެ މަޖިލިސްތަކުގައި ޙުރުމަތްކެނޑުމުން ޢަމަލުކުރާނެ ގޮތްފަދަ މުހިއްމު އުސޫލުތަކާއި، މުހިއްމު އިސްޠިލާޙުތައް ހިމެނިފައިވެއެވެ.

ވީޑިއޯ ކޮންފަރެންސް މެދުވެރިކޮށް ޝަރީޢަތް ހިންގުމުގެ ސަބަބުން މާފުށީ ޖަލުގައި ތިބޭ ގައިދީން ޑްރަގް ކޯޓަށް ޙާޟިރުކުރުން ނިމުމަކަށްއަންނާނެއެވެ. ވީޑިއޯ ކޮންފަރެންސް މެދުވެރިކޮށް އަޑުއެހުންތައް ކުރިއަށް ގެންދިއުމުން ޑްރަގް ކޯޓުގެ ބަޖެޓުން މާފުށްޓަށް ކުރާދަތުރުތަކުގެ ޚަރަދާއި، މާފުށީޖަލުން ޑްރަގް ކޯޓަށް މީހުން ޙާޟިރުކުރުމުގައި އެކި އިދާރާތަކުން ޚަރަދުކުރާ މިންވަރު މަދުވުމުގެ އިތުރުން، ސަލާމަތާއި ރައްކާތެރިކަމުގައި އިތުރު ފިޔަވަޅުތަކެއް އެޅިގެންދާނެއެވެ.

އެވްރެޖް ގޮތެއްގައި ކ. މާފުށީ މެޖިސްޓްރޭޓް ކޯޓުގައި ޑްރަގް ކޯޓުގެ ޝަރީޢަތުގެ އަޑުއެހުން ބޭއްވުމަށްޓަކައި ޑްރަގް ކޯޓުން ކުރާ ދަތުރުތަކަށް ފަސްހާހާއި ހަ ހާހާއި ދެމެދުގެ ޢަދަދަކަށް ފައިސާ ހޭދަވެއެވެ. ވީޑިއޯ ކޮންފަރެންސް މެދުވެރިކޮށް ކުރާ ޝަރީޢަތްތަކަކީ އިސްތިސްނާ ޙާލަތެއްގައި މެނުވީ ޢާންމުކޮށް ހުޅުވާލެވިގެން ކުރިއަށް ގެންދާ ޝަރީޢަތްތަކެކެވެ.